അവകാശങ്ങൾക്കായി സ്ത്രീകൾക്ക് യാചിക്കേണ്ടി വരുന്നു: പി.സതീദേവി

ആലപ്പുഴ ∙ ഭരണഘടന തുല്യനീതി ഉറപ്പു നൽകുമ്പോഴും മൂന്നിലൊന്ന് അവകാശത്തിനു വേണ്ടി ഇന്നും സ്ത്രീകൾക്ക് യാചിക്കേണ്ടി വരുന്നുവെന്നു വനിതാകമ്മിഷൻ അധ്യക്ഷ പി.സതീദേവി പറഞ്ഞു. മഹിളാ ദിനത്തോട് അനുബന്ധിച്ച് സംയുക്ത മഹിളാ സംഘടന സംഘടിപ്പിച്ച സമ്മേളനം ഉദ്ഘാടനം ചെയ്യുകയായിരുന്നു സതീദേവി.

വർക്കിങ് വിമൻസ് കോ–ഓർഡിനേഷൻ കമ്മിറ്റി കൺവീനർ ജി.രാജമ്മ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരി, ജനാധിപത്യ മഹിളാ അസോസിയേഷൻ ജില്ലാ സെക്രട്ടറി പ്രഭാ മധു, ജില്ലാ പ്രസിഡന്റ് ലീലാ അഭിലാഷ്, ജില്ലാ ട്രഷറർ സുശീല മണി, പുഷ്പലത മധു, കർഷക സംഘം വനിത ഉപസമിതി കൺവീനർ കെ.ശ്രീലത, കെഎസ്കെടിയു വനിത ഉപസമിതി കൺവീനർ എൻ.സുധാമണി തുടങ്ങിയവർ പ്രസംഗിച്ചു. സമ്മേളനത്തിനു മുന്നോടിയായി നഗരത്തിൽ റാലിയും നടത്തി.