അരൂക്കുറ്റി–അരൂർ പാലം സമീപനപാതയിൽ ടൈൽ വിരിച്ചു
Mail This Article
തുറവൂർ ∙ അരൂക്കുറ്റി–അരൂർ പാലത്തിന്റെ സമീപന പാതയിൽ ടൈൽ പാകുന്ന ജോലി പൂർത്തിയായി. പാലത്തിന്റെ പടിഞ്ഞാറു ഭാഗത്തെ അരൂർ –അരൂക്കുറ്റി റോഡിനോട് ചേർന്നുള്ള സമീപന പാതയിലാണ് ടൈൽ പാകിയത്. സമീപന പാതയിൽ വർഷങ്ങളായി കുഴികൾ രൂപപ്പെട്ട് വാഹനാപകടങ്ങൾ ഒട്ടേറെ നടന്നു. പൊതുമരാമത്ത് വകുപ്പ് ബ്രിജസ് വിഭാഗത്തിനായിരുന്നു നിർമാണ ചുമതല.
ഒരാഴ്ച കൊണ്ടാണ് ജോലികൾ പൂർത്തിയാക്കാനായത്. തിരക്കേറിയ അരൂർ –അരൂക്കുറ്റി റോഡിലെ ഗതാഗത പ്രശ്നങ്ങൾ കാരണമാണു ജോലികൾ വൈകിയത്. ഗതാഗതക്കുരുക്ക് ഉണ്ടാകുമ്പോൾ ടൈൽ പാകൽ പ്രവർത്തനങ്ങളിൽ ഏർപ്പെട്ടിരുന്ന തൊഴിലാളികളുമായി ഡ്രൈവർമാരും മറ്റു യാത്രക്കാരും തർക്കങ്ങളിൽ ഏർപ്പെട്ടിരുന്നു.
പ്രശ്നം ജില്ലാ കലക്ടറിന്റെ ശ്രദ്ധയിൽ വരെ എത്തി. പിന്നീട് അരൂർ പൊലീസ് എത്തി ഗതാഗത നിയന്ത്രണം ഏറ്റെടുത്തതോടെയാണു പ്രശ്നങ്ങൾക്കു പരിഹാരമായത്. രാത്രി 10 മുതൽ പുലർച്ചെ 6 വരെ കരാറുകാരന്റെ നേതൃത്വത്തിലായിരുന്നു തൊഴിലാളികൾ ടൈൽ പാകൽ പൂർത്തിയാക്കിയത്.