നൂറിൽ ജോറ് ! ഹയർസെക്കൻഡറി പരീക്ഷയിൽ ജില്ലയിൽ 100% വിജയം നേടിയത് 4 സ്കൂളുകൾ
Mail This Article
ഫോണിൽ വിളിച്ചുണർത്തി പഠനം: കാക്കാഴം സ്കൂളിൽ 100%
അമ്പലപ്പുഴ∙ അവധിദിനങ്ങളിലുൾപ്പെടെ പുലർച്ചെ നാലിന് അധ്യാപകർ ഓരോ വിദ്യാർഥിയെയും ഫോണിൽ വിളിച്ചുണർത്തി പഠിക്കാൻ സഹായിച്ചതോടെ തുടർച്ചയായി രണ്ടാം വർഷവും കാക്കാഴം ഗവ. ഹയർ സെക്കൻഡറി സ്കൂളിന് 100% വിജയം. 111 പേരാണു പരീക്ഷ എഴുതിയത്. 58 പേർ സയൻസും 53 പേർ കൊമേഴ്സും. ഇതിൽ 8 പേർക്കു ഫുൾ എപ്ലസ് ലഭിച്ചു. സയൻസിൽ ആറും കൊമേഴ്സിൽ രണ്ടും പേർക്കാണ് ഫുൾ എ പ്ലസ് ലഭിച്ചത്. ഇതിൽ 1200ൽ 1197 മാർക്കുമായി അഭിനാ രാജ് മുന്നിലെത്തി.
സ്കൂൾ പത്താം ക്ലാസ് പരീക്ഷയിലും 100% വിജയം നേടിയിരുന്നു. ഹയർ സെക്കൻഡറി തുടങ്ങിയ 2014ൽ 40% മാത്രമായിരുന്നു വിജയം. ഇത്തവണ പ്ലസ് വൺ പരീക്ഷയിൽ വിജയം 80% ആയിരുന്നു. ഇംപ്രൂവ്മെന്റിൽ 100 ശതമാനമാക്കി ഉയർത്തി. പ്രിൻസിപ്പൽ എസ്.ശശികുമാരി, സീനിയർ അസിസ്റ്റന്റ് അരുൺ ജി.കൃഷ്ണൻ, അധ്യാപകർ, പിടിഎ എന്നിവർ ചേർന്നുള്ള പരിശ്രമമാണു സ്കൂളിന്റെ വിജയത്തിനു പിറകിൽ.
നൂറുമേനി വിജയം കോയ്ത് പഴവങ്ങാടി കാർമൽ അക്കാദമി
ആലപ്പുഴ ∙ അക്കാദമിക രംഗത്തെ ചിട്ടയായ പ്രവർത്തനമാണു പഴവങ്ങാടി കാർമൽ അക്കാദമി ഇഎംഎച്ച്എസ്എസിന് ഹയർസെക്കൻഡറി പരീക്ഷയിൽ നൂറുമേനി വിജയം നേടിക്കൊടുത്തത്. പരീക്ഷയെഴുതിയ 57 പേരും വിജയിച്ചപ്പോൾ 8 പേർ മുഴുവൻ വിഷയങ്ങൾക്കും എ പ്ലസ് നേടി. 1200ൽ 1171 മാർക്ക് നേടിയ ഐന മോനിച്ചനാണു സ്കൂൾ ടോപ്പർ. സ്കൂളിൽ പത്താം ക്ലാസിൽ പരീക്ഷയെഴുതിയ 92 കുട്ടികളും വിജയിച്ചു.
അതിൽ 34 പേർക്ക് എല്ലാ വിഷയങ്ങൾക്കും എ പ്ലസ് ലഭിച്ചിരുന്നു. തുടർച്ചയായ വർഷങ്ങളിൽ എസ്എസ്എൽസിക്കു സ്കൂളിനു 100% വിജയമുണ്ടായിരുന്നു. അധ്യാപകരുടെയും വിദ്യാർഥികളുടെയും കൂട്ടായ പരിശ്രമത്തിന്റെ ഫലമായാണ് ഇത്തവണ പത്താം ക്ലാസിലും പ്ലസ്ടുവിനും 100% വിജയം കൈവരിക്കാനായതെന്നു പ്രിൻസിപ്പൽ ഫാ. നിബിൻ പഴയമഠം പറഞ്ഞു.
വിജയത്തിളക്കത്തിൽ വാടയ്ക്കൽ ഡോ.അംബേദ്കർ സ്കൂൾ
പുന്നപ്ര ∙ ഹയർ സെക്കൻഡറി പരീക്ഷയിൽ കഴിഞ്ഞ തവണ കൈവിട്ടു പോയ 100% വിജയം തിരികെ പിടിച്ച് വാടയ്ക്കൽ ഡോ.ബി. ആർ. അംബേദ്കർ സ്മാരക ഗവ. മോഡൽ റസിഡൻഷ്യൽ സ്കൂൾ. 2017 മുതൽ 21 വരെ തുടർച്ചയായി അഞ്ചു തവണ സ്കൂളിനു 100% ആയിരുന്നു വിജയം. പട്ടികജാതി വികസന വകുപ്പിന് കീഴിലുള്ള സ്കൂളിൽ 37 വിദ്യാർഥിനികളാണു പരീക്ഷയെഴുതിയത്. സയൻസ് വിഷയം മാത്രമുള്ള സ്കൂളിൽ ഒരു വിദ്യാർഥിനിക്കു മുഴുവൻ വിഷയങ്ങൾക്കും എ പ്ലസുണ്ട്.
പ്രിൻസിപ്പൽ ആർ. രഞ്ജിത്തിന്റെ നേതൃത്വത്തിൽ അധ്യാപകരും വിദ്യാർഥികളും നടത്തിയ പരിശ്രമമാണ് വിജയം നേടിക്കൊടുത്തത്. രാവിലെ 9 മുതൽ തുടങ്ങുന്ന ക്ലാസുകൾ 4നു അവസാനിക്കുമെങ്കിലും ക്ലാസുകഴിഞ്ഞ് ഹോസ്റ്റലിലെത്തിയാലും പഠനം രാത്രി വൈകിയും തുടരും. എസ്എസ്എൽസി പരീക്ഷയിലും സ്കൂൾ 100% വിജയം നേടിയിരുന്നു.
ചിട്ടയായ പഠനം മുഹമ്മ മദർ തെരേസ സ്കൂളിന്റെ നേട്ടം
മുഹമ്മ ∙ മുഹമ്മ മദർ തെരേസ എച്ച്എസ്എസിൽ ഇത്തവണ പ്ലസ്ടു പരീക്ഷയെഴുതിയ 92 വിദ്യാർഥികളും വിജയിച്ചു. 1200ൽ 1193 മാർക്ക് നേടി അന്ന ഷിബിയാണ് സ്കൂൾ ടോപ്പർ. 19 വിദ്യാർഥികൾക്കു ഫുൾ എ പ്ലസ് ഉണ്ട്. 2014ലാണ് (അൺ എയ്ഡഡ്) എച്ച്എസ്എസ് വിഭാഗം തുടങ്ങുന്നത്.
കഴിഞ്ഞ വർഷം ഒഴികെ ബാക്കി എല്ലാവർഷവും സ്കൂൾ 100% വിജയം കരസ്ഥമാക്കിയിട്ടുണ്ട്. പ്രിൻസിപ്പൽ ഫാ.ഡോ.സാംജി വടക്കേടത്തിന്റെയും അധ്യാപകരുടെയും കീഴിൽ വിദ്യാർഥികൾ നടത്തിയ ചിട്ടയായ പഠനമാണു കഴിഞ്ഞ വർഷം നഷ്ടമായ 100% വിജയം ഈ വർഷം നേടിയെടുക്കാൻ സഹായിച്ചത്.