മറ്റപ്പള്ളി: മണ്ണുമായി കിടന്ന ലോറികൾ മണ്ണ് തിരിച്ചിറക്കിയ ശേഷം പറഞ്ഞുവിട്ടു

ചാരുംമൂട്∙ മറ്റപ്പള്ളിയിൽ മലയിടിച്ച് മണ്ണുമായി കിടന്ന ലോറികൾ മണ്ണ് തിരിച്ചിറക്കിയ ശേഷം പറഞ്ഞുവിട്ടു. കഴിഞ്ഞ അഞ്ച് ദിവസമായി മലമുകളിൽ മണ്ണ് നിറച്ചു കിടന്ന ലോറികൾ മണ്ണ് തിരിച്ചിറക്കിയ ശേഷം മടങ്ങിപ്പോകണമെന്ന് സമരക്കാർ ആവശ്യപ്പെട്ടിരുന്നു. ഇതിന്റെ പേരിൽ തുടർച്ചയായി രാപകൽ സമരം നടന്നു വരികയായിരുന്നു. കഴിഞ്ഞ ദിവസം രാത്രി ഏഴരയോടെ മണ്ണിറക്കിയ ഒരു ലോറി സമരപ്പന്തലിലേക്ക് ഓടിച്ചുകൊണ്ടുവന്നതായി സമരക്കാർ ആരോപണം ഉയർത്തിയിരുന്നു. തുടർന്ന് ഈ ലോറി തിരിച്ചു കയറ്റി വിടുകയായിരുന്നു. ഇന്നലെ ഉച്ചയ്ക്ക് രണ്ട് മണിയോടെ മൂന്ന് ലോറികളും മണ്ണിറക്കിയിട്ട ശേഷം തിരികെ പോയി. 

എങ്കിലും നിലവിൽ മലയിൽ നിന്നുള്ള മണ്ണെടുപ്പ് പ്രശ്നത്തിന് പരിഹാരം കാണുംവരെയും രാപകൽ സമരം തുടരാനാണ് സമരസമിതിയുടെ തീരുമാനം.  ഒൻപതിന് പാലമേൽ പഞ്ചായത്ത് ജനപ്രതിനിധികൾ നൽകിയിട്ടുള്ള ഹർജിയിന്മേലുള്ള വിധി ഹൈക്കോടതി പുറപ്പെടുവിക്കും. അതുവരെയും സമരം മുന്നോട്ട് കൊണ്ടുപോകും. സമരം നീളുന്നതനുസരിച്ച് നിരവധി സാമൂഹിക സാംസ്കാരിക സംഘടനകൾ സമരക്കാർക്ക് പിന്തുണയുമായി എത്തിക്കൊണ്ടിരിക്കുകയാണ്. ഇന്നലെ ഫാക്ടറി വാർഡ് മെംബർ ദീപ പ്രസന്നന്റെ നേതൃത്വത്തിലായിരുന്നു ഇന്നലെ സമരം നടന്നത്. ഓരോ ദിവസവും രാപകൽ സമരത്തിന് നേതൃത്വം നൽകുന്നത് സമരസമിതി നേതാക്കളും പഞ്ചായത്ത് അംഗങ്ങളും വിവിധ രാഷ്ട്രീയ പാർട്ടി പ്രതിനിധികളും ആണ്.