രണ്ടര വയസ്സുകാരിയെ തട്ടിക്കൊണ്ടുപോകാൻ ശ്രമം: അതിഥിത്തൊഴിലാളി പിടിയിൽ

ഹരിപ്പാട് ∙ വീടിനുള്ളിൽ കളിച്ചുകൊണ്ടിരുന്ന രണ്ടര വയസ്സുകാരിയെ തട്ടിക്കൊണ്ടുപോകാൻ ശ്രമിച്ച അതിഥിത്തൊഴിലാളിയെ നാട്ടുകാർ പിടികൂടി പൊലീസിൽ ഏൽപ്പിച്ചു. ജാർഖണ്ഡ് ബോറിയോഗാവ് സ്വദേശി ദേവാനന്ദ്(30) ആണ് പിടിയിലായത്. ഡാണാപ്പടിയിലെ വീട്ടിലാണ് സംഭവം. കിടപ്പുമുറിയിൽ സഹോദരനൊപ്പം കളിച്ചുകൊണ്ടിരുന്ന രണ്ടര വയസ്സുകാരിയെ ദേവാനന്ദ് എടുക്കാൻ ശ്രമിച്ചതോടെ സഹോദരൻ കരഞ്ഞ് ബഹളം വച്ചു.

സഹോദരനെ തട്ടി മാറ്റി കുട്ടിയുമായി രക്ഷപ്പെടാൻ ശ്രമിക്കുന്നതിനിടെ വീട്ടുകാർ ഓടിയെത്തി. തുടർന്ന് കുട്ടിയെ ഉപേക്ഷിച്ച് ദേവാനന്ദ് സമീപമുള്ള കടയിൽ കയറി. നാട്ടുകാർ പിടികൂടി പൊലീസിൽ ഏൽപ്പിച്ചു. കുട്ടികളെ തട്ടിക്കൊണ്ടുപോയി ഭിക്ഷാടനം നടത്തുന്ന സംഘത്തിൽപ്പെട്ടയാളാണോ എന്നു പൊലീസ് അന്വേഷിക്കുന്നുണ്ട്. പൊലീസ് ചോദ്യം ചെയ്തപ്പോൾ ആദ്യം പരസ്പര വിരുദ്ധമായാണ് സംസാരിച്ചത്. ദേവാനന്ദിന്റെ മൊബൈൽ ഫോൺ കേന്ദ്രീകരിച്ച് അന്വേഷണം നടത്തുന്നുണ്ടെന്നു പൊലീസ് പറഞ്ഞു.