ഇന്നു മുതൽ ഓടിത്തുടങ്ങാൻ കണ്ണൂർ എക്സ്പ്രസ് സ്പെഷൽ; കാത്തുമുഷിഞ്ഞ് തെക്കൻ യാത്രികർ

ബെംഗളൂരു ∙ പൂജ, ദീപാവലി ഉത്സവകാല സ്പെഷൽ ട്രെയിനുകൾ ഇന്ന് സർവീസ് ആരംഭിക്കാനിരിക്കെ, ബെംഗളൂരു- കന്യാകുമാരി എക്സ്പ്രസിന്റെ സമയപ്പട്ടിക പ്രഖ്യാപനം അനിശ്ചിതത്വത്തിൽ. റെയിൽവേ നടപടിയിൽ തെക്കൻ കേരളത്തിലേക്കുള്ള യാത്രക്കാർക്കു നിരാശ. അതേസമയം, യശ്വന്ത്പുര-കണ്ണൂർ എക്സ്പ്രസ് സ്പെഷലിലും (06537-38) കേരള ആർടിസിയുടെ പൂജ സ്പെഷൽ സർവീസുകളിലും ഒട്ടേറെ ടിക്കറ്റുകൾ ബാക്കി. ഇന്നലെ വൈകിട്ടു വരെയുള്ള ബുക്കിങ് പ്രകാരം കണ്ണൂർ എക്സ്പ്രസിൽ പകുതിയിലധികം സീറ്റുകൾ ഒഴിഞ്ഞു കിടക്കുകയാണ്.

മുൻകൂറായി റിസർവേഷൻ ചെയ്തവർക്ക് മാത്രമേ ഈ ട്രെയിനിൽ യാത്ര ചെയ്യാനാകൂ. ട്രെയിൻ പുറപ്പെടുന്നതിനു അര മണിക്കൂർ മുൻപു വരെ റിസർവ് ചെയ്യാം. ഇതൂ കൂടാതെ കേരള ജാഗ്രത സൈറ്റിൽ റജിസ്റ്റർ ചെയ്തിരിക്കണം. 4 ജനറൽ കോച്ചുകളെ സെക്കൻഡ് സിറ്റിങ് കോച്ചുകളാക്കി മാറ്റിയിട്ടുണ്ട്. കണ്ണൂരിലേക്കുള്ള യാത്രയ്ക്ക് സെക്കൻഡ് സിറ്റിങ്ങിൽ 235 രൂപയും സ്‌ലീപ്പറിൽ 475 രൂപയും തേഡ് എസിയിൽ 1285 രൂപയും സെക്കൻഡ് എസിയിൽ 1840 രൂപയുമാണ് ടിക്കറ്റ് നിരക്ക്. 

∙ കണ്ണൂർ എക്സ്പ്രസ് പ്രതിദിന സ്പെഷൽ രാത്രി 8ന് യശ്വന്ത്പുരയിൽ നിന്ന് പുറപ്പെട്ട് സേലം, കോയമ്പത്തൂർ വഴി രാവിലെ 9.50നു കണ്ണൂരിലെത്തും. 

തിരിച്ച് നാളെ മുതൽ വൈകിട്ട് 6.05ന് കണ്ണൂരിൽ നിന്ന് പുറപ്പെട്ട് പിറ്റേദിവസം രാവിലെ 8നു യശ്വന്ത്പുരയിലെത്തും. ഡിസംബർ 1 വരെയാണ് സർവീസ്.