ഇനിയുമുണ്ട് നഗരത്തിൽ 3494 അപകടക്കുഴികൾ

ബെംഗളൂരു∙ നഗരത്തിലെ നിരത്തുകളിൽ ട്രാഫിക് പൊലീസ് കണ്ടെത്തിയ 3494 അപകടക്കുഴികൾ ഇനിയും അടയ്ക്കാനുണ്ടെന്ന് ബിബിഎംപി. 4545 കുഴികളാണ് കണ്ടെത്തിയത്. ഇവയിൽ 1051 എണ്ണം അടച്ചതായി ബിബിഎംപി അഡ്മിനിസ്ട്രേറ്റർ രാകേഷ് സിങ് പറഞ്ഞു. നഗരത്തിലെ റോഡുകളുടെ അവസ്ഥ വിലയിരുത്താൻ അഡീഷനൽ ചീഫ് സെക്രട്ടറി രജനീഷ് ഗോയലിന്റെ അധ്യക്ഷതയിൽ ചേർന്ന യോഗത്തിലാണ് വിശദീകരണം. സിൽക്ക് ബോർഡ്, ജയദേവ, ടിൻ ഫാക്ടറി, ഹെബ്ബാൾ, ഗൊരഗുണ്ഡപാളയ, സാരക്കി, കെഎസ് ലേയൗട്ട്, ബനശങ്കരി ജംക്‌ഷനുകളിലെ ഗതാഗതക്കുരുക്ക് പരിഹരിക്കാനുള്ള മാർഗങ്ങൾ യോഗം ചർച്ച ചെയ്തു. നിർമാണ പ്രവൃത്തിയുടെ ഭാഗമായ വസ്തുക്കൾ നിരത്തുകളിൽ നിന്ന് നീക്കം ചെയ്യണമെന്നും അപകടഭീഷണിയായ മരക്കൊമ്പുകൾ വെട്ടിമാറ്റണമെന്നും ഉദ്യോഗസ്ഥരോട് ബിബിഎംപി ചീഫ് കമ്മിഷണർ തുഷാർ ഗിരിനാഥ് നിർദേശിച്ചു.