ബെംഗളൂരു ∙ മംഗളൂരു പ്രഷർകുക്കർ സ്ഫോടനത്തിൽ പരുക്കേറ്റ മുഖ്യപ്രതി മുഹമ്മദ് ഷാരിഖിനെ (28) ചോദ്യം ചെയ്യാനായി ദേശീയ അന്വേഷണ ഏജൻസി (എൻഐഎ) ഉടൻ കസ്റ്റഡിയിലെടുക്കും. നവംബർ 19ന്  മംഗളൂരുവിലെ ഗരോഡിയിൽ ഷാരിഖ് യാത്ര ചെയ്ത ഓട്ടോ റിക്ഷയിൽ ബോംബ് പൊട്ടിയ കേസാണിത്. 40 % പൊള്ളലേറ്റതിനെ തുടർന്നു ബെംഗളൂരു വിക്ടോറിയ ആശുപത്രിയിൽ ചികിത്സയിലുള്ള ശിവമൊഗ്ഗ തീർഥഹള്ളി സ്വദേശി ഷാരിഖ് സുഖം പ്രാപിക്കുന്നതിനിടെയാണ് എൻഐഎ നീക്കം. ഇസ്‍ലാമിക് സ്റ്റേറ്റ് (ഐഎസ്) ഗൂഢാലാചനാക്കേസ് പ്രതി കൂടിയായ ഷാരിഖ്, കുട്ടികളുടെ ഒരു ചടങ്ങിൽ ബോംബ് സ്ഥാപിക്കാൻ പോകുന്നതിനിടെയാണ് സ്ഫോടനം നടന്നതെന്നാണ് സൂചന.