ജൂൺ 14 വരെ തമിഴ്നാട് തീരത്ത് ട്രോളിങ് നിരോധനം

ചെന്നൈ ∙ തമിഴ്നാട് തീരത്ത് ട്രോളിങ് നിരോധനം ആരംഭിച്ചു. ജൂൺ 14 വരെയാണ് നിരോധനം. കന്യാകുമാരി മുതൽ തിരുവള്ളൂർ വരെയുള്ള കിഴക്കൻ തീരത്ത് യന്ത്രവൽകൃത ബോട്ടുകൾ ഉപയോഗിച്ചുള്ള മീൻപിടിത്തമാണ് നിരോധിച്ചത്. നാടൻ വള്ളങ്ങളിലും ഫൈബർ ബോട്ടുകളിലുമുള്ള തീരദേശ മത്സ്യബന്ധനത്തിന് നിരോധനമില്ല. മത്സ്യങ്ങളുടെ പ്രജനനകാലം കണക്കിലെടുത്താണ് നിരോധനം. വരും ദിവസങ്ങളിൽ മത്സ്യവിലയിൽ വർധനയുണ്ടാകാൻ സാധ്യതയുള്ളതായി വ്യാപാരികൾ പറഞ്ഞു.