ദേശീയപാതയിൽ ചരക്കു ലോറി തലകീഴായി മറിഞ്ഞു
Mail This Article
ചേരാനല്ലൂർ ∙ ദേശീയപാതയിൽ റോഡും നടപ്പാതയും തമ്മിലുള്ള ഉയരവ്യത്യാസത്തിൽ തെന്നി ചരക്കു ലോറി തലകീഴായി മറിഞ്ഞു. ലോറിയുടെ ഡ്രൈവറും ക്ലീനറും സാരമായ പരുക്കുകളില്ലാതെ രക്ഷപ്പെട്ടു. ഇന്നലെ രാവിലെ 11 മണിയോടെയാണ് അപകടം. ദേശീയപാതയിൽ വരാപ്പുഴ ഭാഗത്തു നിന്നു ചേരാനല്ലൂർ ഭാഗത്തേക്കു വരികയായിരുന്ന ലോറി സിഗ്നലിന്റെ സമീപത്തു റോഡരികിലേക്ക് ഒതുക്കുന്നതിനിടെയായിരുന്നു അപകടം. റോഡും നടപ്പാതയും തമ്മിൽ ചിലയിടങ്ങളിൽ ഒരടിയിലേറെ ഉയരവ്യത്യാസം ഉണ്ട്.
ഇൗ ഭാഗങ്ങളിൽ വാഹനാപകടങ്ങൾ പതിവാണ്. ഇരുചക്രവാഹനങ്ങളും ചെറു വാഹനങ്ങളുമാണു കൂടുതലായി അപകടത്തിൽപെടുന്നത്. രാത്രി റോഡിൽ മതിയായ വെളിച്ചം ഇല്ലാത്തതിനാൽ എതിരെ വരുന്ന വാഹനങ്ങൾക്കു വശം കൊടുക്കുന്നതിനിടയിലും അപകടമുണ്ടാകാറുണ്ട്. ഒട്ടേറെത്തവണ ഇതു സംബന്ധിച്ചു പരാതികൾ നൽകിയിട്ടും പ്രശ്നം പരിഹരിക്കാൻ അധികൃതരുടെ ഭാഗത്തു നിന്നു നടപടികൾ സ്വീകരിച്ചിട്ടില്ലെന്നാണു പരാതി.