ഓട്ടുക്കമ്പനി സ്ഥലം സാമൂഹിക വിരുദ്ധരുടെ താവളം; രാപകലില്ലാതെ അഴിഞ്ഞാടുകയാണ്

നീലീശ്വരം ∙ മലയാറ്റൂർ ‍- നീലീശ്വരം പഞ്ചായത്തിൽ നീലീശ്വരത്തു പള്ളുപ്പേട്ട തോടിനു സമീപമുള്ള പഴയ ഓട്ടുക്കമ്പനി സ്ഥലം സാമൂഹിക വിരുദ്ധരുടെ താവളമായി മാറിയിരിക്കുന്നു. കാലടി പൊലീസ് കസ്റ്റഡിയിൽ എടുക്കുന്ന വാഹനങ്ങൾ തൊണ്ടി മുതലായി കൊണ്ടുവന്നിടുന്നതും ഈ സ്ഥലത്താണ്. കാലങ്ങളായി കിടക്കുന്ന വാഹനങ്ങൾ കാടുകയറി നശിച്ചുക്കൊണ്ടിരിക്കുന്നു. നിറയെ ഇഴജന്തുക്കളും ഇവിടെയുണ്ട്. നാട്ടുകാർ ഇങ്ങോട്ടു വരാൻ ഭയപ്പെടുന്നു. ഇതിന്റെ മറവിൽ സാമൂഹിക വിരുദ്ധർ രാപകലില്ലാതെ അഴിഞ്ഞാടുകയാണ്.

നാട്ടുകാർക്ക് ഇത് വലിയ ബുദ്ധിമുട്ടുകൾ ഉണ്ടാക്കുന്നു. ഒരു സഹകരണ സംഘത്തിന്റെ കീഴിലുള്ള ഓട്ടുക്കമ്പനി വർഷങ്ങൾക്കു മുൻപ് പ്രവർത്തനം നിലച്ചതാണ്. ഖാദി ബോർഡിനു സംഘം ലക്ഷക്കണക്കിനു രൂപ കൊടുത്തു തീർക്കാനുണ്ട്. ബാധ്യതകൾ തീർത്തു പഞ്ചായത്ത് ഈ സ്ഥലം ഏറ്റെടുത്താൽ വിവിധ പദ്ധതികൾക്കു പ്രയോജനപ്പെടുത്താനാകും. നാടിന് ഒരു കളിക്കളം എന്ന പദ്ധതിയിൽ ഉൾപ്പെടുത്തി ഇവിടെയൊരു കളിക്കളവും പാർക്കും നിർമിക്കാവുന്നതാണ്. 

- എബി പോൾ, നീലീശ്വരം ഏജന്റ്.