വൻതോതിൽ ചാളയെത്തി: വീശുകാർക്കും കടപ്പുറത്ത് കാത്തു നിന്നവർക്കും കൺകുളിർത്ത കാഴ്ച

എളങ്കുന്നപ്പുഴ∙ കടലിന്റെ മക്കളുടെ കാത്തിരിപ്പിനു വിരമം കുറിച്ചു തീരക്കടലിൽ വൻതോതിൽ ചെറിയ ചാളയെത്തി. തീരക്കടലിൽ വീശുവലയെറിഞ്ഞവരുടെ വലകൾ നിറയെ ചാള ലഭിച്ചു.12,15 സെ.മീറ്റർ വലിപ്പമുള്ളവയാണ് ലഭിച്ചവയിൽ കൂടുതലും. വീശുകാർക്കും കടപ്പുറത്ത് കാത്തു നിന്നവർക്കും കൺകുളിർത്ത കാഴ്ച മാലിപ്പുറം, പുതുവൈപ്പ് തീരങ്ങളിലായിരുന്നു. കിലോഗ്രാമിന് 100 രൂപ നിരക്കിലായിരുന്നു വിൽപന.

കടലിൽ മീൻപിടിക്കാനിറങ്ങിയ ചെറിയ വളളങ്ങൾക്കും ചാള ലഭിച്ചു.അത് 50 രൂപ നിരക്കിൽ വിറ്റു. നിശ്ചിത അളവിൽ കുറഞ്ഞവ പിടിച്ചാൽ കർശന നടപടി സ്വീകരിക്കുമെന്നു ഫിഷറീസ് അധികൃതർ മുന്നറിയിപ്പ് നൽകിയിട്ടുണ്ട്. നിശ്ചിത അളവിൽ കുറഞ്ഞ  ചാളയും തീരക്കടലിൽ കാണുന്നുണ്ട്. വലിയ വള്ളങ്ങൾക്കു നല്ല തോതിൽ അയലയും ലഭിച്ചു. കിലോഗ്രാമിന് 40 രൂപ നിരക്കിലായിരുന്നു വിൽപന.