തെരുവുനായ കുറുകെ ചാടി ; കാർ ട്രാൻസ്ഫോമറിൽ ഇടിച്ചു

ആലങ്ങാട് ∙ തെരുവുനായ റോഡിനു കുറുകെ ചാടിയതിനെ തുടർന്നു കാർ ട്രാൻസ്ഫോമറിൽ ഇടിച്ച് അപകടം സംഭവിച്ചു. ഇന്നലെ ഉച്ചയോടെയാണ് ആലുവ– പറവൂർ പ്രധാന പാതയിൽ മന്നം കവലയ്ക്കു സമീപം അപകടം നടന്നത്. ആലുവയിൽ നിന്നു പറവൂർ ഭാഗത്തേക്കു പോകുകയായിരുന്ന കാർ തെരുവുനായയെ ഇടിക്കാതിരിക്കാൻ പെട്ടെന്നു ബ്രേക്കിട്ടപ്പോൾ നിയന്ത്രണം വിട്ടു സമീപത്തെ ട്രാൻസ്ഫോമറിൽ ഇടിക്കുകയായിരുന്നു. മൂത്തകുന്നം സ്വദേശികളാണു കാറിലുണ്ടായിരുന്നത്. ആർക്കും ഗുരുതര പരുക്കില്ല. ഇടിയുടെ ആഘാതത്തിൽ കാറിന്റെ മുൻഭാഗം തകരുകയും ട്രാൻസ്ഫോമറിന്റെ കമ്പിവേലി തകർന്നു വാഹനത്തിനു മുകളിലേക്കു പതിക്കുകയും ചെയ്തു.