കരുണ ആശുപത്രിയിൽ ഐസലേഷൻ വാർഡ്

നെടുങ്കണ്ടം ∙ ഇടുക്കി രൂപത താൽക്കാലികമായി വിട്ടുനൽകിയ കരുണ ആശുപത്രിയിൽ ഇന്നലെ മുതൽ ഐസലേഷൻ വാർഡ് പ്രവർത്തനം ആരംഭിച്ചു. ഇന്നലെ 3 പേരുടെ സ്രവം പരിശോധനയ്ക്കായി എടുത്തു. കഴിഞ്ഞ ആഴ്ച ആശുപത്രി കോവിഡ് 19 ഐസലേഷൻ വാർഡുകൾക്കായി ഇടുക്കി രൂപത നെടുങ്കണ്ടം പഞ്ചായത്തിനു വിട്ടുനൽകിയിരുന്നു. താലൂക്ക് ആശുപത്രിയിലെ 5 ഡോക്ടർമാരുടെ പ്രത്യേക സംഘത്തെ 2 ടീമുകളായി കരുണ ആശുപത്രിയിൽ വിന്യസിച്ചു. താലൂക്ക് ആശുപത്രിയിലെ നഴ്സുമാരെയും അറ്റൻഡറെയും നിയോഗിച്ചു.

രോഗം സംശയിക്കുന്നവരിൽ നിന്ന് എടുക്കുന്ന സാംപിൾ കോട്ടയത്തെ ലാബിലാണ് പരിശോധിക്കുന്നത്. ഡൽഹി നിസാമുദീനിൽ നിന്നു തിരിച്ചെത്തിയ വ്യക്തി ഉൾപ്പെടെ 3 പേരുടെ സാംപിളാണ് ഇന്നലെ ശേഖരിച്ചത്. ആശുപത്രി വളപ്പിൽ താൽക്കാലികമായി പ്രവർത്തിച്ചു കൊണ്ടിരുന്ന സ്പോർട്സ് ഹോസ്റ്റൽ താലൂക്ക് ആശുപത്രി ജീവനക്കാർക്കു താമസത്തിനായി നെടുങ്കണ്ടം ബ്ലോക്ക് പഞ്ചായത്ത് വിട്ടുനൽകി. കെട്ടിടം ആശുപത്രി സൂപ്രണ്ടിനു കൈമാറിയതായി ബ്ലോക്ക് പഞ്ചായത്ത് ഭരണസമിതി അറിയിച്ചു.