ദേഹത്തു തട്ടിയാൽ അസഹ്യമായ ചൊറിച്ചിൽ; പുഴുക്കളെക്കൊണ്ട് പൊറുതിമുട്ടി നാട്

തൊടുപുഴ ∙ ദേഹത്തു തട്ടിയാൽ അസഹ്യമായ ചൊറിച്ചിലിനു കാരണമാകുന്ന പുഴുക്കളെക്കൊണ്ട് പൊറുതിമുട്ടി നാട്ടുകാർ. വെട്ടിമറ്റം, കലയന്താനി, കുടയത്തൂർ, മുട്ടം, ആനക്കയം മേഖലകളിലാണു പുഴുശല്യം. വീട്ടുമുറ്റത്തും പറമ്പിലുമുള്ള മരങ്ങളിലാണ് ഇവ വസിക്കുന്നത്.

വീടിന്റെ ഭിത്തിയിലും വാതിലുകൾ ജനലുകൾ എന്നിവിടങ്ങളിലും ഇവ കയറിയിരിക്കും. ശരീരത്തിൽ സ്പർശിച്ചാൽ പിന്നെ അസഹ്യമായ ചൊറിച്ചിലാണ്. ഇതിന്റെ സൂചി പോലെ കൂർത്ത രോമങ്ങൾ ശരീരത്തിൽ കുത്തിക്കയറും. ജില്ലാ വെക്ടർ കൺട്രോൾ യൂണിറ്റും ആരോഗ്യ വകുപ്പും നടപടികൾ സ്വീകരിക്കണമെന്നാണു നാട്ടുകാരുടെ ആവശ്യം.