പാൽ ടാങ്കർ മറിഞ്ഞു ഡ്രൈവർക്കു പരുക്ക്

ചെറുതോണി ∙ അടിമാലി – കുമളി ദേശീയപാതയിൽ കരിമ്പനു സമീപം മിൽമയുടെ പാൽ ടാങ്കർ ലോറി മറിഞ്ഞു ഡ്രൈവർക്കു ഗുരുതര പരുക്ക്. കഞ്ഞിക്കുഴി പഴയരിക്കണ്ടം സ്വദേശി റെജിക്കാണു പരുക്കേറ്റത്. നാട്ടുകാരും ഇടുക്കി അഗ്നിരക്ഷാസേനയുടെ ചേർന്നാണ് ഡ്രൈവറെ പുറത്തെടുത്തത്. ആദ്യം ഇടുക്കി മെഡിക്കൽ കോളജിലും പിന്നീട് കോട്ടയം മെഡിക്കൽ കോളജ് ആശുപത്രിയിലും പ്രവേശിപ്പിച്ചു.

കരിമ്പൻ മണിപ്പാറ സ്കൂളിനു സമീപം ബുധനാഴ്ചയായിരുന്നു അപകടം. കൊടുംവളവിൽ നിയന്ത്രണം വിട്ട ടാങ്കർ തിട്ടയിലിടിച്ചു റോഡിലേക്കു മറിയുകയായിരുന്നു. കഞ്ഞിക്കുഴി, ചേലച്ചുവട്, ക്ഷീര സംഘങ്ങളിൽ നിന്നു പാൽ ശേഖരിച്ചു കട്ടപ്പനയിലെ പ്ലാന്റിലേക്കു പോകും വഴിയാണ് അപകടം.