ഇറച്ചിൽപാറ വെള്ളച്ചാട്ടം ജലസമൃദ്ധം; സഞ്ചാരികളുടെ ഒഴുക്ക്

മറയൂർ∙ ഇറച്ചിൽപാറ വെള്ളച്ചാട്ടം ജലസമൃദ്ധമായതോടെ മറയൂർ കാന്തല്ലൂർ മേഖയിലേക്കു വിനോദസഞ്ചാരികളുടെ ഒഴുക്ക്. മൂന്നു മാസമായി അവധി ദിവസങ്ങളിലും മറ്റു ദിവസങ്ങളിലുമായി ഒട്ടേറെ പേരാണു വെള്ളച്ചാട്ടം സന്ദർശിക്കാൻ എത്തുന്നത്. തമിഴ്നാട് അതിർത്തി ഉദുമൽപേട്ടയിൽ നിന്നും മൂന്നാറിൽ നിന്നും  40 കിലോമീറ്റർ ദൂരത്തിലാണ് മറയൂർ. മറയൂരിലെ ചന്ദനക്കാട്, ചിന്നാർ വന്യജീവി സങ്കേതം, തൂവാനം വെള്ളച്ചാട്ടം, കാന്തല്ലൂരിലെ പഴം, പച്ചക്കറിത്തോട്ടങ്ങൾ, മുനിയറകൾ, കീഴാന്തൂരിലെ കച്ചാരം വെള്ളച്ചാട്ടം തുടങ്ങിയവ മേഖലയിൽ സഞ്ചാരികളെ ആകർഷിക്കുന്നു. ആന, കാട്ടുപോത്ത്, മ്ലാവ്, മറയൂർ ചന്ദനക്കാടിനുള്ളിലെ പുള്ളിമാൻകൂട്ടം തുടങ്ങിയവയെയും കാണാനാകും. മറയൂർ കോവിൽ കടവിൽ നിന്ന് ഒരു കിലോമീറ്റർ യാത്ര ചെയ്താൽ ഇടക്കടവ് ഇറച്ചിൽപാറ വെള്ളച്ചാട്ടത്തിൽ എത്താം