മേരികുളം സ്കൂളിൽ വേറിട്ട വനിതാദിനാഘോഷം

മേരികുളം∙ പാചകത്തൊഴിലാളികളും അധ്യാപകരുമെല്ലാം വനിതകളായ മേരികുളം സെന്റ് മേരീസ് എൽപി സ്കൂളിലെ വനിതാ ദിനാഘോഷം വേറിട്ട അനുഭവമായി. കെജി മുതൽ നാലാം ക്ലാസ് വരെയുള്ള ഈ സ്കൂൾ പത്തു വർഷത്തോളമായി വനിതകളുടെ നിയന്ത്രണത്തിലാണ്. 2019 മുതൽ ബിന്ദു സെബാസ്റ്റ്യനാണ് ഹെഡ്മിസ്ട്രസ്. ഒരു ഹെൽപറും 17 അധ്യാപകരുമാണ് ഈ സ്കൂളിലുള്ളത്. കൂടാതെ 2 പാചകത്തൊഴിലാളികളും വനിതകളാണ്. സ്‌കൂളിൽ ആകെ 487 വിദ്യാർഥികളിൽ 240 പേർ വിദ്യാർഥിനികളാണ്.  ഇരട്ടകൾ ഉൾപ്പെടെ 6 കുട്ടികളുടെ മാതാവായ സോണിയ സാജനെ ആദരിച്ചു. ഇവരുടെ 4 മക്കൾ ഈ സ്‌കൂളിലാണ് പഠിക്കുന്നത്.