കെണിയൊരുക്കി മൂടാത്ത ഓട; അപകടത്തിലാകുന്നത് ഇരു ചക്രവാഹന യാത്രികർ

നെല്ലാപ്പാറ∙ തൊടുപുഴ – പാലാ റോഡിലെ നെല്ലാപ്പാറ ഇറക്കത്തിൽ കെണിയൊരുക്കി മൂടാത്ത ഓട. ഒട്ടേറെ വാഹനങ്ങൾ ഇവിടെ അപകടത്തിൽ പെടുന്നതായി സ്ഥലവാസികൾ പറയുന്നു. കെഎസ്ടിപിയുടെ ആധുനിക നിലവാരത്തിലുള്ള റോഡ് നിർമാണം പൂർത്തിയാക്കി വർഷങ്ങൾ പിന്നിട്ടിട്ടും ഈ ഭാഗത്തെ ഓടകൾ മൂടിയിട്ടില്ല.

ഒന്നരയടിയിലേറെ ആഴമുണ്ട് ഓടയ്ക്ക്. റിഫ്ലക്ടറുകൾ സ്ഥാപിക്കാനായി റോഡരികിൽ നിർമിച്ചിരുന്ന കോൺക്രീറ്റ് തൂണുകൾ എല്ലാം തന്നെ വാഹനങ്ങൾ ഇടിച്ച് ഓടയിൽ വീണുകിടക്കുന്നത് കാണാം. ഇരുചക്ര വാഹനയാത്രക്കാരാണ് കൂടുതലും അപകടത്തിൽ പെടുന്നത്. ഈ റൂട്ടിലെ വഴിവിളക്കുകൾ എല്ലാം തകരാറിലായതിനാൽ രാത്രി കനത്ത ഇരുട്ടാണ് ഈ ഭാഗത്ത്. ശ്രദ്ധ പാളിയാൽ ഓടയിൽ വീഴുമെന്ന് ഉറപ്പാണ്.

തൊടുപുഴ – പാലാ റോഡിലെ ഏറ്റവും അപകടസാധ്യതയുള്ള ഭാഗങ്ങളിൽ ഒന്നാണ് ഇത്. സമീപത്തുള്ള കുരിശുപള്ളി വളവിൽ ഒട്ടേറെ അപകടങ്ങൾ ഉണ്ടായിട്ടുണ്ട്. ഒരാഴ്ച മുൻപ് ഒരു ചരക്കുലോറി ഇവിടെ നിയന്ത്രണം വിട്ട് മറിഞ്ഞിരുന്നു. ഈ ഭാഗത്ത് അപകടസാധ്യത ഇല്ലാതാക്കണമെന്ന് നാട്ടുകാർ ആവശ്യപ്പെട്ടു.