പരിമിതികളെ ബൈ ബൈ; ആവേശമായി ‘ഉണർവ് ’
Mail This Article
കണ്ണൂർ∙ പരിമിതികൾ മറന്നുള്ള മുന്നേറ്റങ്ങൾ, ആവേശത്തോടെയുള്ള ആർപ്പുവിളിയും ആരവങ്ങളും. ഒടുവിൽ തിളക്കമാർന്ന വിജയങ്ങളും. ജില്ലാ പഞ്ചായത്തിന്റെയും സാമൂഹിക നീതി വകുപ്പിന്റെയും നേതൃത്വത്തിൽ നടക്കുന്ന 'ഉണർവ് 2022' ലോകഭിന്നശേഷി വാരാഘോഷത്തിന്റെ ഭാഗമായ കായിക മേളയാണ് അതിജീവനത്തിന്റെ സന്ദേശമായത്. ജില്ലയിലെ ബഡ്സ് സ്കൂളുകളിലെയും സ്പെഷൽ സ്കൂളുകളിലെയും വിദ്യാർഥികളാണ് കായിക മത്സരങ്ങളിൽ പങ്കെടുത്തത്. സബ്ജൂനിയർ, ജൂനിയർ, സീനിയർ വിഭാഗങ്ങളിൽ 400 പേർ കായിക മേളയിൽ മാറ്റുരച്ചു. 50, 100 മീറ്റർ ഓട്ട മത്സരം, ഷോട്ട് പുട്ട്, സോഫ്റ്റ് ബോൾ ത്രോ, വീൽ ചെയർ റെയ്സ് എന്നിവയായിരുന്നു മത്സര ഇനങ്ങൾ.
വാരാഘോഷം ജില്ലാ പഞ്ചായത്ത് പ്രസിഡന്റ് പി.പി.ദിവ്യ ഉദ്ഘാടനം ചെയ്തു. ജില്ലാ ഡവലപ്മെന്റ് കമ്മിഷണർ ഡി.ആർ.മേഘശ്രീ അധ്യക്ഷത വഹിച്ചു. സ്ഥിരം സമിതി അധ്യക്ഷൻ വി.കെ.സുരേഷ് ബാബു, ജില്ലാ ലീഗൽ സർവീസ് അതോറിറ്റി സെക്രട്ടറി വിൻസി ആൻ പീറ്റർ ജോസഫ്, ജില്ലാ സാമൂഹിക നീതി ഓഫിസർ എം അഞ്ജു മോഹൻ, സീനിയർ സൂപ്രണ്ട് പി.കെ.നാസർ, സംസ്ഥാന വികലാംഗ ക്ഷേമ കോർപറേഷൻ ഡയറക്ടർ ഒ. വിജയൻ, ഡിഫറന്റ്ലി ഏബിൾഡ് വെൽഫെയർ ഫെഡറേഷൻ പ്രതിനിധി എ.ഷിജു, ഡിഫറന്റ്ലി ഏബിൾഡ് പീപ്പിൾസ് ലീഗ് പ്രതിനിധി ഉമ്മർ വിളക്കോട്, ഡിഫറന്റ്ലി ഏബിൾഡ് പീപ്പിൾസ് കോൺഗ്രസ് പ്രതിനിധി ദാസൻ മേക്കിലേരി, കേരള പാരന്റ്സ് അസോസിയേഷൻ ഓഫ് ഹിയറിങ് ഇംപയേർഡ് പ്രതിനിധി പി.കെ.ഹാഷിം, അഖില കേരള വികലാംഗ ഫെഡറേഷൻ പ്രതിനിധി ടി.വി.മോഹനൻ, കണ്ണൂർ നാഷനൽ ട്രസ്റ്റ് ലോക്കൽ ലവൽ കമ്മിറ്റി പ്രതിനിധി പി.കെ.സിറാജ് എന്നിവർ പങ്കെടുത്തു.
കലാ മത്സരങ്ങൾ നാളെ പൊലീസ് സഭാ ഹാളിൽ നടക്കും. ഭിന്നശേഷി സൗഹൃദ ജില്ല എന്ന വിഷയത്തിൽ കലക്ടറേറ്റിൽ 6നു നടക്കുന്ന ശിൽപശാലയോടെ വാരാഘോഷം സമാപിക്കും.
∙. ഭിന്നശേഷിക്കാർക്ക് രണ്ടുകോടി രൂപയുടെ സ്കോളർഷിപ് ജില്ലയിൽ വിതരണം ചെയ്തതായി ജില്ലാ പഞ്ചായത്ത് പ്രസിഡന്റ് പി.പി.ദിവ്യ പറഞ്ഞു. പഞ്ചായത്തുകൾ നൽകുന്ന സ്കോളർഷിപ്പുകളിൽ പ്രധാന വിഹിതം ജില്ലാ പഞ്ചായത്താണ് നൽകുന്നത്. ബഡ്സ് സ്കൂളുകളുടെ പ്രവർത്തനം വിപുലീകരിക്കാനും ഭൗതിക സാഹചര്യം മെച്ചപ്പെടുത്താനും ജില്ലാ പഞ്ചായത്തിന്റെ സഹായത്തോടെ പഞ്ചായത്തുകൾ പദ്ധതികൾ ആസൂത്രണം ചെയ്യുന്നുണ്ട്. ഈ വർഷം ബ്ലോക്ക് തലത്തിൽ ഭിന്നശേഷി സംഗമം സംഘടിപ്പിക്കുമെന്നും ദിവ്യ പറഞ്ഞു.