ചെറുപുഴ∙ ഭക്ഷണ സാധനങ്ങൾ വിതരണം ചെയ്യുന്ന ഓട്ടോ ടാക്സി ഓട്ടോറിക്ഷയിൽ ഇടിച്ചു 3 പേർക്ക് പരുക്കേറ്റു. ഓട്ടോറിക്ഷയിലുണ്ടായിരുന്ന ലിയോ കരിശേരിയിൽ (38), സജേഷ് കുന്നുമ്മൽ (33), അനി മൂന്നുവീട്ടിൽ(41) എന്നിവർക്കാണു പരുക്കേറ്റത്. ഇവരെ ചെറുപുഴയിലെ സ്വകാര്യാശുപത്രിയിൽ പ്രവേശിപ്പിച്ചു. ഇന്നലെ വൈകുന്നേരം 5ന് ആണ് അപകടം. ചെറുപുഴയിൽ നിന്നു വരികയായി ഓട്ടോ ടാക്സി നിയന്ത്രണം വിട്ടു കോക്കടവ് ടൗണിൽ നിർത്തിയിട്ടിരുന്ന ഓട്ടോറിക്ഷയിൽ ഇടിക്കുകയായിരുന്നു. ഇടിയുടെ ആഘാതത്തിൽ ഓട്ടോറിക്ഷ തെറിച്ചു  സമീപത്തു നിർത്തിയിട്ടിരുന്ന കാറിൽ ഇടിക്കുകയായിരുന്നു. 3 വാഹനങ്ങൾക്കും കാര്യമായ കേടുപാടുകൾ സംഭവിച്ചു.