ഓട്ടോറിക്ഷകളുടെ സമാന്തര സർവീസ്: സർവീസ് നിർത്തുമെന്ന് സ്വകാര്യ ബസുകൾ

ചെറുവത്തൂർ ∙ ഓട്ടോറിക്ഷകൾ ഗ്രാമങ്ങളിൽ സമാന്തര സർവീസ് നടത്തുന്നുവെന്ന് ആരോപിച്ച് മേഖലയിൽ സ്വകാര്യ ബസുകൾ സർവീസ് നിർത്തിവയ്ക്കാനൊരുങ്ങുന്നു. മടക്കര, പടന്ന, കയ്യൂർ, വലിയ പറമ്പ്, ചീമേനി, കാലിക്കടവ്, ഓരിമുക്ക് തുടങ്ങിയ സ്ഥലങ്ങളിലേക്ക് ഓട്ടോറിക്ഷകൾ സമാന്തര സർവീസ് നടത്തുന്നതു മൂലം ഈ റൂട്ടിലെ സ്വകാര്യ ബസുകൾക്ക് ഡീസലിനും ടാക്സിനും വേണ്ട പണം തികയാത്ത സാഹചര്യമാണെന്ന് ബസ് ഉടമകളുടെയും തൊഴിലാളികളുടെയും സംയുക്ത യോഗം ആരോപിച്ചു.

പ്രശ്ന പരിഹാരമുണ്ടായില്ലെങ്കിൽ ഈ മേഖലയിൽ ബസ് സർവീസ് നിർത്തിവയ്ക്കാനാണ് തീരുമാനം. യോഗത്തിൽ ബസ് ഓണേഴ്സ് അസോസിയേഷൻ ഹൊസ്ദുർഗ് താലൂക്ക് പ്രസിഡന്റ് സി.രവി അധ്യക്ഷനായി. ജില്ല സെക്രട്ടറി ടി.ലക്ഷ്മണൻ, ജോ.സെക്രട്ടറി കെ.ടി.സുരേഷ് ബാബു, ടി. കൃഷ്ണൻ, കെ.അഭിലാഷ്, എ.രതീഷ്, എം.വേണുഗോപാൽ, പി.രാമചന്ദ്രൻ തുടങ്ങിയവർ പ്രസംഗിച്ചു.