ലോറിയിൽനിന്ന് കരിങ്കല്ല് റോഡിലേക്ക് തെറിച്ചു; റോഡിൽ യാത്രക്കാരില്ലാതിരുന്നതിനാൽ ഒഴിവായത് വൻദുരന്തം

ചെറുപുഴ∙ ടോറസ്സിൽ നിന്നും കൂറ്റൻ കരിങ്കല്ല് റോഡിലേക്ക് തെറിച്ചു വീണു. രാജഗിരിയിൽ നിന്നു കരിങ്കല്ലുമായി ചെറുപുഴ ഭാഗത്തേയ്ക്ക് പോകുകയായിരുന്ന ടോറസ്സിൽ നിന്നാണു കരിങ്കല്ല് രാജഗിരി ടൗണിനു സമീപത്തു വച്ചു റോഡിലേക്ക് തെറിച്ചു വീണത്. ഈ സമയം റോഡിൽ കാൽനടയാത്രക്കാരും ചെറുവാഹനങ്ങളും ഇല്ലാതിരുന്നതുമൂലം വൻദുരന്തം ഒഴിവായി. ഇന്നലെ രാവിലെ പള്ളിയിൽ പോകുന്നവരാണു കരിങ്കല്ല് റോഡിൽ വീണുകിടക്കുന്ന നിലയിൽ കണ്ടത്.

ശനിയാഴ്ച രാത്രിയിലാണു കല്ല് വാഹനത്തിൽ നിന്നു റോഡിലേക്ക് വീണതെന്നു കരുതുന്നു. നിർമാണ സാമഗ്രികളുമായി പോകുന്ന ലോറികളുടെ മേൽഭാഗം ടാർപോളിൻ കൊണ്ടു മൂടണം, ഇരുട്ടായാൽ കരിങ്കല്ലുമായി വാഹനങ്ങൾ റോഡിലൂടെ സഞ്ചരിക്കരുത് തുടങ്ങിയ നിയമങ്ങളെല്ലാം കാറ്റിൽ പറത്തിയാണു അളവിൽ കൂടുതൽ കരിങ്കല്ലുമായി ടോറസ്സുകൾ തിരക്കേറി റോഡുകളിലൂടെ  പായുന്നത്. നിയമം ലംഘിക്കുന്നവരുടെ പേരിൽ നടപടിയെടുക്കാതെ മൗനം പാലിക്കുകയാണു അധികൃതർ ചെയ്യുന്നതെന്നു നാട്ടുകാർ ആരോപിക്കുന്നു.