ബൂത്തിനായി സ്കൂളൊരുക്കി; ഇനി ക്ലാസുകളും നടത്താം

പാപ്പിനിശ്ശേരി ∙ ഈ തിരഞ്ഞെടുപ്പുകൊണ്ട് ഒരു ഗവ. പ്രൈമറി സ്കൂളിനാണ് കെട്ടുറപ്പ് ലഭിച്ചത്. കെട്ടിടത്തിന്റെ അറ്റകുറ്റപ്പണി നടക്കാത്തതിനാൽ  ഒരു വർഷമായി പാപ്പിനിശ്ശേരി കാട്ടിലെപള്ളി ഗവ.മാപ്പിള എൽപി സ്കൂൾ സമീപത്തെ വാടക വീട്ടിലാണ് പ്രവർത്തിക്കുന്നത്. തിരഞ്ഞെടുപ്പ് പ്രമാണിച്ചു കെട്ടിടത്തിന്റെ അറ്റകുറ്റപ്പണി വേഗത്തിൽ പൂർത്തിയാക്കിയതിനാൽ അഴീക്കോട് മണ്ഡലത്തിലെ 2 പോളിങ് ബൂത്തുകൾ ഇവിടെ സുഗമമായി പ്രവർത്തിച്ചു. 41,43 ബൂത്തുകളാണ് പ്രവർത്തിച്ചത്. കെട്ടിടത്തിന്റെ അറ്റകുറ്റപ്പണി നടക്കാതെ അപകടകരമായ നിലയിലായതോടെയാണു ക്ലാസുകൾ മാറി പ്രവർത്തിച്ചത്. അടുത്ത അധ്യയന വർഷം ഈ കെട്ടിടത്തിൽ പ്രവർത്തിക്കാനാകുമെന്നു നാട്ടുകാർ അറിയിച്ചു.