രാഷ്ട്രീയ കൊലപാതകങ്ങളുടെ ഇരകൾ സ്ത്രീകൾ: ഷാഹിദ കമാൽ

കാസർകോട് ∙ രാഷ്ട്രീയ കൊലപാതകങ്ങളുടെ ഇരകളാകുന്നവർ സ്ത്രീകളും കുട്ടികളുമാണെന്നു വനിതാ കമ്മിഷൻ അംഗം ഷാഹിദ കമാൽ. ആശയങ്ങൾ കൊണ്ടാണ് രാഷ്ട്രീയം വ്യക്തമാക്കേണ്ടതെന്നും അതിന് ആയുധങ്ങൾ ആവശ്യമില്ലെന്നും ഷാഹിദ പറഞ്ഞു. ആലപ്പുഴ കൊലപാതകത്തിന്റെ പശ്ചാത്തലത്തിലായിരുന്നു അംഗത്തിന്റെ അഭിപ്രായപ്രകടനം. കാസർകോട് നടന്ന അദാലത്തിനു ശേഷമാണ് ഷാഹിദ ഇങ്ങനെ പ്രതികരിച്ചത്. 

സ്വത്തു തർക്കവുമായി ബന്ധപ്പെട്ടു ഭാര്യ സമർപ്പിച്ച പരാതിയിൽ കമ്മിഷൻ ഇടപെട്ടതിനെ തുടർന്ന് അവരുടെ പണം തിരികെ ലഭിച്ചതായി പരാതിക്കാരി കമ്മിഷനെ അറിയിച്ചു.അദാലത്തിൽ 35 പരാതികൾ പരിഗണിച്ചു. 10 പരാതികൾ തീർപ്പാക്കി. 4 പരാതികൾക്കു റിപ്പോർട്ട് തേടി. 21 പരാതികൾ അടുത്ത സിറ്റിങ്ങിലേക്കു മാറ്റി. അഭിഭാഷക പാനലിലുള്ള പി.സിന്ധു, എം.ഇന്ദിരാവതി, ഫാമിലി കൗൺസലർ രമ്യമോൾ എന്നിവർ അദാലത്തിൽ പങ്കെടുത്തു.