മൊഗ്രാൽ അടിപ്പാത നിർമാണം പുരോഗമിക്കുന്നു; സ്കൂൾ റോഡിൽ വെള്ളക്കെട്ട് രൂക്ഷം

മൊഗ്രാൽ ∙ ദേശീയപാത വികസനവുമായി ബന്ധപ്പെട്ട് മൊഗ്രാൽ ടൗണിൽ അടിപ്പാത നിർമാണം  പുരോഗമിക്കവേ  സമീപത്തെ സ്കൂൾ റോഡിൽ വെള്ളക്കെട്ട് രൂക്ഷമായി. ഇത് വിദ്യാർഥികൾക്കും കാൽനടയാത്രക്കാർക്കും ദുരിതമായി.അടിപ്പാതയുടെ നിർമാണ പ്രവൃത്തിക്കായി  സ്കൂൾ റോഡ് അടച്ചിട്ടതാണ് വെള്ളക്കെട്ടിന് കാരണമായത്.

വാഹനഗതാഗതത്തിന് പകരം സംവിധാനം ഏർപ്പെടുത്തിയിട്ടുണ്ടെങ്കിലും വെള്ളക്കെട്ട് ഒഴിവാക്കാൻ നടപടി സ്വീകരിക്കാത്തതാണ് ദുരിതത്തിനിടയാക്കിയത്. മഴ കൂടുതൽ ശക്തമായാൽ റോഡ് വെള്ളത്തിൽ മുങ്ങുമെന്ന ആശങ്ക നാട്ടുകാർക്കും രക്ഷിതാക്കൾക്കുമുണ്ട്. ദിവസേന നൂറുകണക്കിന് വാഹനങ്ങളാണ് സ്കൂൾ- പേരാൽ റോഡിലൂടെ പോകുന്നത്.

ഇതുവഴി അമിതവേഗതയിൽ വാഹനങ്ങൾ ഓടിച്ചു പോകുന്നതും വിദ്യാർഥികൾക്കും കാൽനടയാത്രക്കാർക്കും പ്രയാസമാകുന്നു.സ്കൂളിനടുത്ത് വാഹനങ്ങളുടെ അമിത വേഗം  നിയന്ത്രിക്കാൻ സംവിധാനം ഒരുക്കണമെന്നാണു നാട്ടുകാർ ആവശ്യപ്പെടുന്നത്.