ഇരിക്കൂർ ∙ പടിയൂർ ചടച്ചിക്കുണ്ടത്തെ കാഞ്ഞിരത്താംകുന്നേൽ ബെന്നി ജോസഫിന്റെ വീട് കുത്തിത്തുറന്ന് 20 പവൻ സ്വർണവും 22,000 രൂപയും കവർന്ന സംഭവത്തിൽ 2 പേർ അറസ്റ്റിൽ. കൊല്ലം ഏഴുകോൺ എടക്കിടത്തെ എസ്.അഭിരാജ് (31), കാസർകോട് ഹൊസ്ദുർഗ് ശാരദ നഗറിൽ കെ.കിരൺ (29) എന്നിവരെയാണ് ഇരിക്കൂർ പ്രിൻസിപ്പൽ എസ്ഐ: കെ.ദിനേശനും സംഘവും ഇന്നലെ പുലർച്ചെ ധർമശാലയിലെ ലോഡ്ജിൽ വച്ച് അറസ്റ്റ് ചെയ്തത്.
ഞായറാഴ്ചയാണ് കവർച്ച നടന്നത്. രാവിലെ 7ന് വീട്ടുകാർ സമീപത്തെ കല്ലുവയൽ സെന്റ് ആന്റണീസ് ദേവാലയത്തിൽ കുർബാനയ്ക്ക് പോയ സമയത്തായിരുന്നു മോഷണം. സ്വർണവും പണവും ലോഡ്ജ് മുറിയിൽ നിന്നു കസ്റ്റഡിയിലെടുത്തു. കണ്ണൂർ കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. എസ്ഐ ബാലകൃഷ്ണൻ, എഎസ്ഐ പ്രശാന്ത്, സീനിയർ സിവിൽ പൊലീസ് ഓഫിസർ രഞ്ജിത്, റഷീദ്, ഡിവൈഎസ്പി സ്ക്വാഡ് അംഗങ്ങളായ എസ്ഐ അബ്ദുൽ റൗഫ്, സിവിൽ പൊലീസ് ഓഫിസർ ജയദേവൻ എന്നിവരും അന്വേഷണ സംഘത്തിലുണ്ടായിരുന്നു.
