തൊഴിലുറപ്പ് തൊഴിലാളികൾക്ക് നൽകിയത് കാലാവധി കഴിഞ്ഞ ഗുളികകൾ: റിപ്പോർട്ടിനു ശേഷം തുടർനടപടി
Mail This Article
നീലേശ്വരം ∙ തൊഴിലുറപ്പ് തൊഴിലാളികൾക്ക് ഉപയോഗ കാലാവധി കഴിഞ്ഞ എലിപ്പനി പ്രതിരോധ ഗുളികകൾ വിതരണം ചെയ്ത സംഭവത്തിൽ ആരോഗ്യ വകുപ്പ് അന്വേഷണം തുടങ്ങി. കിനാനൂർ കരിന്തളം പഞ്ചായത്ത് എട്ടാം വാർഡ് ആയ പരപ്പയിൽ മാളൂർകയത്തെ തൊഴിലാളികൾക്കാണ് 2023 മേയിൽ ഉപയോഗ കാലാവധി കഴിഞ്ഞ ഗുളികകൾ നൽകിയത്. ജില്ലാ മെഡിക്കൽ ഓഫിസറുടെ നിർദേശപ്രകാരം ഡിസ്ട്രിക്ട് സർവൈലൻസ് ഓഫിസർക്കാണ് അന്വേഷണ ചുമതല നൽകിയിരിക്കുന്നത്.
ഇദ്ദേഹത്തിന്റെ നേതൃത്വത്തിലുള്ള മെഡിക്കൽ സംഘം ഇന്നലെ കോയിത്തട്ടയിലെ കിനാനൂർ കരിന്തളം കുടുംബാരോഗ്യ കേന്ദ്രം സന്ദർശിച്ച് വിവരങ്ങൾ ശേഖരിച്ചു. റിപ്പോർട്ട് തയാറാക്കിയ ശേഷം തുടർനടപടികൾ സ്വീകരിക്കും. തൊഴിലുറപ്പ് മേറ്റുമാർ വഴിയാണു കാലാവധി കഴിഞ്ഞ ഡോക്സിസൈക്ലിൻ ഗുളികകൾ വിതരണം ചെയ്തത്.
പലരും ഈ ഗുളികകൾ കഴിക്കുകയും ചെയ്തിരുന്നു. അതേസമയം, ആർക്കും ആരോഗ്യപ്രശ്നങ്ങൾ റിപ്പോർട്ട് ചെയ്യപ്പെട്ടിട്ടില്ല. മരുന്നു കഴിച്ചവരിൽ ആരോഗ്യപ്രശ്നങ്ങൾ ഉള്ളവർ കിനാനൂർ കരിന്തളം കുടുംബാരോഗ്യ കേന്ദ്രവുമായി ബന്ധപ്പെട്ട് ചികിത്സ തേടണമെന്നും ആരോഗ്യ വകുപ്പിന്റെ നിർദേശമുണ്ട്.
English Summary: Expired doxycycline tablets were distributed among more than 100 rural employment workers at Kasaragod