മംഗളൂരു- കോഴിക്കോട് പാതയിൽ കൂടുതൽ ട്രെയിനുകൾ; കുമ്പളയിൽ സ്റ്റോപ് വേണമെന്ന് ആവശ്യം

കുമ്പള∙ മംഗളൂരു- കോഴിക്കോട് ഭാഗങ്ങളിലേക്ക്  കൂടുതൽ ട്രെയിനുകൾ ഓടിത്തുടങ്ങിയതോടെ ഏറെ തിരക്കേറിയ കുമ്പള റെയിൽവേ സ്റ്റേഷനിൽ ഇവയിൽ ഒരു ട്രെയിനിനെങ്കിലും സ്റ്റോപ്പ് അനുവദിക്കണമെന്ന ആവശ്യം ശക്തമാകുന്നു. ഈ ആവശ്യം ഉന്നയിച്ച് യാത്രക്കാരും പാസഞ്ചേഴ്സ് അസോസിയേഷനും വിവിധ സംഘടനകളും വ്യാപാരികളും നിവേദനങ്ങളുമായി റെയിൽവേ അധികൃതരെ സമീപിച്ചുവെങ്കിലും ഇതുവരെ അനുകൂലമായ നടപടിയുണ്ടായില്ല.  ഏറെക്കുറെ നല്ല വരുമാനം ലഭിക്കുന്ന ജില്ലയിലെ  സ്റ്റേഷനുകളിലൊന്നാണ്. 

സ്റ്റോപ്പില്ല
വന്ദേ ഭാരത്  ഉൾപ്പെടെ 2 ട്രെയിനുകളാണ് മംഗളൂരു-കോഴിക്കോട് ഭാഗങ്ങളിലേക്ക് ഈ മാസം മുതൽ സർവീസ് തുടങ്ങിയത്.  ബെംഗളൂരു -കണ്ണൂർ എക്സ്പ്രസ് ഇപ്പോൾ കോഴിക്കോട്ട് വരെ നീട്ടിയിട്ടുണ്ട്.  ഈ ട്രെയിനിന് കുമ്പളയിൽ സ്റ്റോപ്പിനായി ആവശ്യം ഉന്നയിക്കാൻ തുടങ്ങിയിട്ട് ഏറെയായി. 

പരശുറാം, മാവേലി ട്രെയിനുകൾക്കും പോലും കുമ്പളയിൽ സ്റ്റോപ്പില്ല. മഞ്ചേശ്വരം, കാസർകോട് മണ്ഡലങ്ങളിലെ  സർക്കാർ ഓഫിസുകളിലും  സ്ഥാപനങ്ങളിലുമായി എത്തേണ്ട യാത്രക്കാർ മലബാർ, പാസഞ്ചർ ട്രെയിനുകളെയാണ് ഇപ്പോഴും ആശ്രയിക്കുന്നത്.