നെടുമ്പന ആശുപത്രി വളപ്പിലെ ചന്ദനമരം മുറിച്ചുകടത്തി

കണ്ണനല്ലൂർ‌∙ നെടുമ്പന കമ്യൂണിറ്റി ഹെൽത്ത് സെന്റർ വളപ്പിലെ 5 ലക്ഷം രൂപയിലേറെ വില വരുന്ന ചന്ദനമരം മുറിച്ചു കടത്തി. ചൊവ്വ രാത്രിയിലാണ് മോഷണം നടന്നതായാണു സംശയം. ആശുപത്രിയിലെ പിപി ബ്ലോക്കിന് സമീപം നിന്ന ചന്ദന മരമാണ് മോഷണം പോയത്. ഏകദേശം പതിമൂന്നര ഏക്കറിലധികം സ്ഥലമാണ് ആശുപത്രിക്കുള്ളത്. എന്നാൽ ചുറ്റുമതിൽ ഇല്ലാത്തതിനാൽ ഇവിടെ സാമൂഹിക വിരുദ്ധർ താവളമാക്കുന്നുവെന്ന പരാതി പണ്ടേയുണ്ട്.

മുഖത്തല ബ്ലോക്കിന്റെ കീഴിലാണ് ആശുപത്രി പ്രവർത്തിക്കുന്നത്. ചന്ദന മരം മുറിച്ചു കടത്തിയതുമായി ബന്ധപ്പെട്ട് ആശുപത്രി സൂപ്രണ്ട് നിബു ജോൺ കണ്ണനല്ലൂർ പൊലീസിൽ പരാതി നൽകി. ചന്ദനമരം മോഷണം പോയതിനെക്കുറിച്ച് അന്വേഷണം നടത്തണമെന്ന് യൂത്ത് കോ‍ൺഗ്രസ് സംസ്ഥാന ജനറൽ സെക്രട്ടറി ഫൈസൽ കുളപ്പാടം ആവശ്യപ്പെട്ടു. യൂത്ത് കോൺഗ്രസ് ജില്ലാ സെക്രട്ടറി സജാദ് മലേവയൽ, ഷഹീർ മുട്ടയ്ക്കാവ്, റാഷിദ് പാലമൂട്, സിയാദ്, ലത്തീഫ്, അനീഷ് തുടങ്ങിയവർ പ്രസംഗിച്ചു.