തടിപിടിക്കാൻ എത്തിച്ച ആന ഇടഞ്ഞു; മരങ്ങൾ പിഴുതെറിഞ്ഞു, വൈദ്യുതത്തൂണുകളും മതിലും ഗേറ്റും തകർത്തു

കവിയൂർ ∙ തടിപിടിക്കാൻ എത്തിച്ച ആന ഇടഞ്ഞു. വൈദ്യുതത്തൂണുകളും മതിലും ഗേറ്റും തകർത്ത ആന മരങ്ങളും പിഴുതെറിഞ്ഞു. ആനയെ 3 മണിക്കൂറിനു ശേഷം പാപ്പാൻമാർ തളച്ചു. കൊല്ലം സ്വദേശിയുടെ ഉടമസ്ഥതയിലുള്ള ശിവം അയ്യപ്പൻ ആനയാണ് ഇന്നലെ വൈകിട്ട് നാലരയോടെ ഇടഞ്ഞത്.

തടി പിടിക്കാൻ ആനയെ കവിയൂരിലെ ഗുഹാ ക്ഷേത്രത്തിന് സമീപം എത്തിച്ചപ്പോഴായിരുന്നു സംഭവം. ക്ഷേത്രത്തിന് സമീപത്തെ പുരയിടത്തിൽ നിലയുറപ്പിച്ച ആനയെ രാത്രി ഏഴരയോടെയാണ് തളച്ചത്. റാന്നിയിൽ നിന്നുള്ള വനം വകുപ്പ് സംഘവും എത്തിയിരുന്നു.