ടിപ്പറുകളുടെ മരണപ്പാച്ചിൽ; ബൈക്ക് യാത്രികന് പരുക്ക്

തലയോലപ്പറമ്പ് ∙ ടിപ്പർ ലോറി ഇടിച്ച് ബൈക്ക് യാത്രികനു പരുക്ക്. പൊതി കളപ്പുരയ്ക്കൽ അനന്ദു(23)വിനാണു പരുക്കേറ്റത്. അപകടത്തിൽ കാലിനും നട്ടെല്ലിനും ഒടിവ് സംഭവിച്ച അനന്ദുവിനെ കോട്ടയം മെഡിക്കൽ കോളജിൽ പ്രവേശിപ്പിച്ചു. ഇന്നലെ പുലർച്ചെ 7.30നു പൊതി കപ്പേളയ്ക്കു സമീപമായിരുന്നു അപകടം. കോവിഡ് നിയന്ത്രണങ്ങളിൽ ഇളവ് വന്നതോടെ നിയമങ്ങളും നിയന്ത്രണങ്ങളും കാറ്റിൽ പറത്തി ടിപ്പർ ലോറികളുടെ മരണ പാച്ചിലിനെതിരെ പ്രതിഷേധം ശക്തമായിരിക്കുകയാണ്.

പുലർച്ചെ 4 മുതൽ മണ്ണെടുപ്പ് ആരംഭിക്കും. കൂടുതൽ ട്രിപ്പ് ഓടിക്കാനുള്ള മരണ പാച്ചിലിനിടെയാണ് അപകടം. നിയമങ്ങളും നിയന്ത്രണങ്ങളും കാറ്റിൽ പറത്തി അനധികൃതമായി മണ്ണു കടത്തുന്ന ടിപ്പർ ലോറികൾക്കെതിരെ നടപടി സ്വീകരിക്കണമെന്നും പൊലീസ് പരിശോധന കർശനമാക്കണമെന്നും നാട്ടുകാർ ആവശ്യപ്പെട്ടു. സംഭവവുമായി ബന്ധപ്പെട്ട് ടിപ്പർ ലോറി കസ്റ്റഡിയിൽ എടുത്തതായി തലയോലപ്പറമ്പ് സിഐ ബിൻസ് ജോസഫ് പറഞ്ഞു.