പൈപ്പ് അറ്റകുറ്റപ്പണിക്കിടെ ജലപ്രവാഹം, വെള്ളക്കെട്ട്
Mail This Article
കോട്ടയം ∙ കോടിമത, പള്ളിപ്പുറത്തുകാവ് എന്നിവിടങ്ങളിൽ ശുദ്ധജലം എത്തിക്കുന്ന എസി പൈപ്പിന്റെ വാൽവിലെ തകരാർ നന്നാക്കുന്നതിനിടെ ചന്തക്കവല വെള്ളത്തിലായി. പൈപ്പിനുള്ളിൽ കെട്ടിക്കിടന്ന വെള്ളം പമ്പ് ചെയ്തു മാറ്റുന്നതിനിടെയാണു വെള്ളക്കെട്ടുണ്ടായത്. കുറച്ചു ദിവസങ്ങൾക്കു മുൻപ് വാൽവിനു തകരാർ കണ്ടെത്തിയതിനെത്തുടർന്നാണു റോഡ് വെട്ടിപ്പൊളിച്ചത്. ഇതിനുള്ളിൽ കെട്ടിക്കിടക്കുന്ന വെള്ളം മുഴുവൻ പമ്പ് ചെയ്ത് കളയാതെ പുതിയ വാൽവ് വയ്ക്കാൻ സാധിക്കാത്തതിനാൽ ഉച്ചയോടെ വെള്ളം മുഴുവൻ മോട്ടർ ഉപയോഗിച്ചു പമ്പ് ചെയ്തു കളഞ്ഞു.
പൈപ്പിലൂടെയുള്ള ജലവിതരണം ഇതോടെ പൂർണമായി നിർത്തിവയ്ക്കേണ്ടി വന്നു. റോഡിൽ മുഴുവൻ വെള്ളമായതിനാൽ യാത്ര ബുദ്ധിമുട്ടിലായി. പലരുടെയും ശരീരത്തിലേക്കു വെള്ളം തെറിച്ചതും പ്രശ്നമായി. ഇന്നലെത്തന്നെ അറ്റകുറ്റപ്പണി തീർത്തു ജലവിതരണം പുനഃസ്ഥാപിച്ചതായി ജലഅതോറിറ്റി അസിസ്റ്റന്റ് എക്സിക്യൂട്ടീവ് എൻജിനീയർ എൻ.ഐ.കുര്യാക്കോസ് പറഞ്ഞു.