ഉമ്മൻ ചാണ്ടി ഓർമയായിട്ട് ഇന്ന് ഒരു മാസം; പുതുപ്പള്ളി പള്ളിയിൽ ഇന്നു രാവിലെ പ്രത്യേക പ്രാർഥന

കോട്ടയം ∙ മുൻ മുഖ്യമന്ത്രി ഉമ്മൻ ചാണ്ടി ഓർമയായിട്ട് ഇന്ന് ഒരു മാസം. 30–ാം ഓർമദിനത്തിലെ പ്രത്യേക പ്രാർഥനകൾ ഇന്നു രാവിലെ പുതുപ്പള്ളി ഓർത്തഡോക്സ് വലിയ പള്ളിയിൽ നടക്കും. യൂഹാനോൻ മാർ പോളിക്കാർപ്പോസ് മുഖ്യകാർമികത്വം വഹിക്കും.40–ാം ഓർമദിനം 26നാണ്. അന്നും പള്ളിയിലും കല്ലറയിലും പ്രത്യേക പ്രാർഥനകൾ‌ നടക്കും. 41–ാം ഓർമദിനം 27നു തിരുവനന്തപുരത്തെ വസതിയിൽ ആചരിക്കും. ഇതോടെയാണു മരണാനന്തരച്ചടങ്ങുകളുടെ ഭാഗമായുള്ള പ്രാർഥനകൾ പൂർണമാകുന്നത്. 

അതുവരെ പുതുപ്പള്ളി പള്ളിയിൽ എല്ലാ ദിവസവും പ്രത്യേക കുർബാന നടക്കുന്നുണ്ട്. കഴിഞ്ഞ മാസം 18നു പുലർച്ചെ 4.25ന് ബെംഗളൂരുവിലാണ് ഉമ്മൻ ചാണ്ടി അന്തരിച്ചത്.