പുരയിടത്തിൽ നിന്ന് പെരുമ്പാമ്പിനെ പിടികൂടി

കുമരകം ∙ പള്ളിവക പുരയിടത്തിൽ നിന്നു കൂറ്റൻ പെരുമ്പാമ്പിനെ പിടികൂടി. വടക്കുംകര പള്ളിയുടെ പുരയിടത്തിലെ കുറ്റിക്കാടുകൾ വെട്ടി തെളിക്കുന്നതിനിടെയാണു പെരുമ്പാമ്പിനെ തൊഴിലാളികൾ കണ്ടത്. തുടർന്നു നാട്ടുകാരെയും കൂട്ടി പെരുമ്പാമ്പിനെ പിടികൂടി കെട്ടിയിട്ടു. ഇന്നലെ വൈകിട്ട് മൂന്നിനായിരുന്നു സംഭവം. 10 അടി നീളവും ഏകദേശം 40 കിലോ തൂക്കവും വരുന്ന പെരുമ്പാമ്പിനെയാണു പിടികൂടിയതെന്നു നാട്ടുകാർ പറഞ്ഞു. പഞ്ചായത്ത് പ്രസിഡന്റ് ധന്യ സാബു അറിയിച്ചതിനെത്തുടർന്നു വനപാലകർ എത്തി പാമ്പിനെ കൊണ്ടുപോയി.