വെള്ളമില്ലാതെ തലയാഴം പഞ്ചായത്ത്
Mail This Article
വൈക്കം ∙ തലയാഴം പഞ്ചായത്തിന് സ്വന്തമായി കുടിവെള്ള പദ്ധതി ഉണ്ടെങ്കിലും ദാഹം മാറ്റണമെങ്കിൽ ജനം കിലോമീറ്ററുകൾ താണ്ടണം. വേനൽ കടുത്തതോടെ തലയാഴം പഞ്ചായത്തിലെ ഗ്രാമീണ ജല സ്രോതസ്സുകൾ മിക്കതും വറ്റിവരണ്ട നിലയിലാണ്. ഉള്ളത് ഉപ്പുവെള്ളം ആയതോടെ വീട്ടാവശ്യത്തിനു പൈപ്പ് വെള്ളം മാത്രമാണ് ആശ്രയം. ഉല്ലല, കൊതവറ, പുത്തൻപാലം, മാടപ്പള്ളി, പുന്നപ്പുഴി, പള്ളിയാട്, ഇട ഉല്ലല, കൂവം, അമ്പാനപ്പള്ളി, ചെറുകാട്, കണ്ടംതുരുത്ത്, മൂലക്കരി തുടങ്ങിയ പ്രദേശങ്ങളിൽ കുടിവെള്ളം എത്തിയിട്ട് ആഴ്ചകളായി. ബന്ധപ്പെട്ട അധികാരികളോട് പല വട്ടം പരാതിപ്പെട്ടിട്ടും നടപടി ഉണ്ടാകുന്നില്ലെന്ന് നാട്ടുകാർ ആരോപിച്ചു.
പമ്പിങ് കേന്ദ്രത്തിൽ യന്ത്ര തകരാർ, വൈദ്യുത മുടക്കം എന്നീ കാരണങ്ങൾ പറഞ്ഞ് കയ്യൊഴിയുന്ന അവസ്ഥയാണെന്നു നാട്ടുകാർ പറയുന്നു. തലയാഴം പഞ്ചായത്തിൽ സ്ഥാപിച്ചിട്ടുള്ള വാട്ടർ ടാങ്കിൽ വെള്ളം കയറാത്തതാണു ഇത്രയേറെ കുടിവെള്ള ക്ഷാമം അനുഭവപ്പെടാൻ കാരണം. തലയാഴം പഞ്ചായത്തിലെ കുടിവെള്ളക്ഷാമത്തിനു ശാശ്വത പരിഹാരം കണ്ടില്ലെങ്കിൽ ശക്തമായ പ്രതിഷേധ സമരം സംഘടിപ്പിക്കാനുള്ള തയാറെടുപ്പിലാണ് പ്രദേശവാസികൾ.