അമിത വൈദ്യുതി പ്രവാഹം; ഒട്ടേറെ വീടുകളിൽ ഗൃഹോപകരണങ്ങൾ കത്തിനശിച്ചു

മേപ്പയൂർ∙ അമിത വൈദ്യുതി പ്രസരണം കാരണം കൊഴുക്കല്ലൂർ പ്രദേശത്തെ ഒട്ടേറെ വീടുകളിൽ ഗൃഹോപകരണങ്ങൾ കത്തിനശിച്ചു. കോരമ്മൻകണ്ടി അന്ത്രുവിന്റെ വീട്ടിലെ ഫ്രിജും മറ്റു ഗൃഹോപകരണങ്ങളും കത്തിനശിച്ചു. 2 ലക്ഷം രൂപയുടെ നഷ്ടം കണക്കാക്കുന്നു. മന്നത്തുപൊയിൽ ചന്ദ്രൻ, വാരിയംപറക്കൽ മനോജ്, ടി.എം.സുരേഷ്, കൊക്കർണി രഞ്ജിത്ത്, ബാലൻ കൊക്കർണി എന്നിവരുടെ വീടുകളിൽ ഫാൻ, മിക്സി എന്നിവ കത്തി നശിച്ചു. പല വീടുകളിലും ബൾബുകൾ പൊട്ടിത്തെറിച്ചു. നഷ്ടപരിഹാരം ആവശ്യപ്പെട്ട് കെഎസ്ഇബി അധികൃതർക്കും ഉപഭോക്തൃ കോടതിയിലും പരാതി നൽകുമെന്ന് നാട്ടുകാർ പറഞ്ഞു.