നിയന്ത്രണംവിട്ട ബസിടിച്ചു ബാങ്കിന്റെ മതിൽ തകർന്നു

കുറ്റ്യാടി∙ നിയന്ത്രണം വിട്ട സ്വകാര്യ ബസിടിച്ചു ബാങ്കിന്റെ മതിൽ തകർന്നു. ബാങ്കിന് സമീപം ഉണ്ടായിരുന്ന 2 പെൺകുട്ടികൾ തലനാഴിയ്ക്കാണ് രക്ഷപ്പെട്ടത്. ഇന്നലെ വൈകുന്നേരം 3.50–നാണ് വടകരയിൽ നിന്നും കുറ്റ്യാടിയിലേക്ക് വരികയായിരുന്ന സ്വകാര്യ ബസ് കക്കട്ടിലെ വടകര താലൂക്ക് കാർഷിക വികസന ബാങ്കിന്റെ മതിലിൽ ഇടിച്ചത്. മതിൽ പൂർണമായും തകർന്നു. ബാങ്കിന് മുന്നിൽ നിർത്തിയിട്ട ജീവനക്കാരായ ലാലു, ജിതിൻ എന്നിവരുടെ കാറുകൾ ഭാഗികമായി തകർന്നു.ബാങ്കിന് മുറ്റത്തുണ്ടായിരുന്ന ജീവനക്കാരന്റെ മകളും സമീപത്തു കൂടെ നടന്നുപോയ മറ്റൊരു പെൺകുട്ടിയും അത്ഭുതകരമായി രക്ഷപ്പെട്ടു. പരുക്കേറ്റ ബസ് യാത്രക്കാരായ നരിക്കാട്ടേരി ജാനു (63), മുഹമ്മദ് ഷാനു, ആയിഷ എന്നിവർ  കക്കട്ടിലെ സ്വകാര്യ ആശുപത്രിയിൽ ചികിത്സ തേടി. ആരുടെയും പരുക്ക് ഗുരുതരമല്ല.