പുറമേരിയിൽ വീടിനു തീപിടിച്ചു; കിടപ്പുമുറി പൂർണമായി കത്തി നശിച്ചു

നാദാപുരം∙ പുറമേരി ഹോമിയോ മുക്കിൽ നെടുമ്പ്രം കണ്ടി ആലിയുടെ വീടിനു തീപിടിച്ച് കിടപ്പുമുറി പൂർണമായി കത്തി നശിച്ചു. ഇന്നലെ വൈകിട്ട് ആറോടെയാണ് സംഭവം.  വീട്ടിൽ ആളില്ലായിരുന്നു. അയൽവാസികളായ കുട്ടികൾ വീട്ടു മുറ്റത്ത് എത്തിയപ്പോൾ  പുക ഉയരുന്നത് കണ്ട്  ആലിയെ ഫോൺ വിളിച്ചു വരുത്തി വീട് തുറന്നപ്പോഴാണ് കിടപ്പ് മുറിയിലെ കിടക്കയും കട്ടിലും കത്തുന്നത് കാണുന്നത്. ഓടിക്കൂടിയ നാട്ടുകാരും ചേലക്കാട് നിന്ന് 2  യൂണിറ്റ് അഗ്നിരക്ഷാ സേനയും എത്തി തീ  അണച്ചു. കിടപ്പുമുറിയിലെ സ്വിച്ച് ബോർഡുകളും ഫാനും തുണികളും മറ്റും കത്തി നശിച്ചു. ഷോർട്ട് സർക്യൂട്ടാണ് കാരണമെന്നാണ് കരുതുന്നത്.