പോപ്പുലർ ഫ്രണ്ട് ഹർത്താൽ സംഘപരിവാറിന് ഉത്തേജകമായി: പി.കെ.കുഞ്ഞാലിക്കുട്ടി

നാദാപുരം∙ പോപ്പുലർ ഫ്രണ്ട് നടത്തിയ ഹർത്താൽ ഇന്ത്യയിൽ മുഴുവൻ സംഘപരിവാറിന് ഉത്തേജകം നൽകാൻ വേണ്ടിയായിരുന്നെന്ന് മുസ്‌ലിം ലീഗ് ദേശീയ ജനറൽ സെക്രട്ടറി പി.കെ.കുഞ്ഞാലിക്കുട്ടി എംഎൽഎ. എംഎസ്എഫ് നിയോജക മണ്ഡലം റാലി ഉദ്ഘാടനം ചെയ്യുകയായിരുന്നു അദ്ദേഹം. റാലി കല്ലാച്ചിയിൽ മുസ്‍‌ലിം ലീഗ്  ജില്ലാ വൈസ് പ്രസിഡന്റ് അഹമ്മദ് പുന്നക്കൽ ഫ്ലാഗ് ഓഫ് ചെയ്തു.  സ്വാഗതസംഘം ചെയർമാൻ സൂപ്പി നരിക്കാട്ടേരി പതാക ഉയർത്തി. എംഎസ്എഫ് നിയോജക മണ്ഡലം പ്രസിഡന്റ് മുഹ്സിൻ വളപ്പിൽ അധ്യക്ഷത വഹിച്ചു. യൂത്ത് ലീഗ് ദേശീയ ജനറൽ സെക്രട്ടറി ഫൈസൽ ബാബു, എംഎസ്എഫ് സംസ്ഥാന പ്രസിഡന്റ് പി.കെ.നവാസ്, ജനറൽ സെക്രട്ടറി സി.കെ.നജാഫ്, ലീഗ് ദേശീയ അസിസ്റ്റന്റ് സെക്രട്ടറി സി.കെ.സുബൈർ, ജില്ലാ ജനറൽ സെക്രട്ടറി എം.എ.റസാഖ്, ട്രഷറർ പാറക്കൽ അബ്ദുല്ല, മിസ്ഹബ് കീഴരിയൂർ, അഹമ്മദ് പുന്നക്കൽ, സൂപ്പി നരിക്കാട്ടേരി തുടങ്ങിയവർ പ്രസംഗിച്ചു.