കുരുക്കിനു മീതെ കൂകിപ്പറന്ന് ടിപ്പറുകൾ

കൂടരഞ്ഞി ∙ പോസ്റ്റ് ഓഫിസ് ജംക്​ഷനിലെ ഗതാഗതക്കുരുക്കും സ്കൂൾ വിടുന്ന സമയത്ത് നിയന്ത്രണം ഇല്ലാതെ പായുന്ന ടിപ്പറുകളും യാത്രക്കാർക്ക് ദുരിതമായി. മലയോര ഹൈവേ നിർമാണം നടക്കുന്നതിനാൽ ഈ ഭാഗത്ത് വലിയ ഗതാഗതത്തിരക്ക് അനുഭവപ്പെടുന്നുണ്ട്. അതിനിടെയാണ് ഒരു നിയന്ത്രണവും ഇല്ലാതെ സ്കൂൾ സമയത്ത് ടിപ്പറുകൾ ചീറിപ്പായുന്നത്.മാങ്കയം, കൂമ്പാറ, ബൈപാസ്, അങ്ങാടി എന്നീ ഭാഗങ്ങളിലേക്കുള്ള വാഹനങ്ങൾ ഈ ജംക്​ഷനിൽ സംഗമിക്കും. ഇതോടെ ഏറെ സമയം വാഹനങ്ങൾക്ക് കടന്നു പോകാൻ സാധിക്കാത്ത നിലയാകും. അപകടങ്ങളും ഇവിടെ ധാരാളം നടക്കുന്നുണ്ട്. സ്കൂൾ വിടുന്ന സമയത്ത് ഗതാഗതം ക്രമീകരിക്കാനും  ടിപ്പറുകളുടെ  ഓട്ടം നിയന്ത്രിക്കാനും പൊലീസ് ഇടപെടണം എന്നാണ് രക്ഷിതാക്കളുടെയും നാട്ടുകാരുടെയും ആവശ്യം.