പന്തീരാങ്കാവിൽ ആശുപത്രിയിലും വീടുകളിലും വെള്ളം കയറി

പന്തീരാങ്കാവ്∙ ശക്തമായ ഒറ്റ മഴയിൽ ആശുപത്രിയിലും വീടുകളിലും വെള്ളം കയറി. കുടിവെള്ളവും മുടങ്ങി. പെരുമണ്ണ റോഡിലെ പന്തീരാങ്കാവ് എഎം ആശുപത്രിയിലാണ് വെള്ളക്കെട്ടായത്. രോഗികളടക്കം രാത്രി വലഞ്ഞു. മഴവെള്ളം ഒഴുകിപ്പോകാൻ ഇടമില്ലാതെ വന്നതോടെയാണ് വീടുകളിലും ആശുപത്രിയിലും വെള്ളം കയറിയത്. ദേശീയപാത നിർമാണം നടക്കുന്ന ഭാഗത്ത് റോഡരിക് മണ്ണ് ഇടിഞ്ഞതാണ് പ്രധാന കാരണം. കിണറുകളിലെ വെള്ളം മലിനമായതോടെ കുടിവെള്ളം മുടങ്ങി. ദേശീയപാത പന്തീരാങ്കാവ് നോർത്ത് ജംക്‌ഷന് സമീപം തൊണ്ടശ്ശേരി താഴത്ത് സ്വകാര്യ സ്ഥലത്തേക്ക് ഉയരത്തിൽ റോഡ് നിർമിച്ചതു ഗതാഗതക്കുരുക്കിനും വെള്ളക്കെട്ടിനും ഇടയാക്കുന്നതായി പരാതിയുണ്ട്.