പൊതുമരാമത്തിന്റെ അനാസ്ഥയിൽ കല്ലാച്ചി ടൗൺറോഡ് വികസനം വൈകുന്നു

കല്ലാച്ചി∙ ടൗണിലെ റോഡ് വീതി കൂട്ടുന്നതിന് 2023ലെ ബജറ്റിൽ അനുവദിച്ച 3 കോടി രൂപയുടെ പ്രവൃത്തി ടെൻഡർ പോലുമായില്ല. കടകളുടെ മുൻ ഭാഗം പൊളിച്ചു റോഡിനോടു ചേർക്കുന്ന പ്രവൃത്തിയുടെ അളവെടുപ്പും മാർക്ക് ചെയ്യലും സർവകക്ഷി കർമ സമിതി നേതൃത്വത്തിൽ നടത്തിയിട്ട് മാസങ്ങൾ കഴിഞ്ഞെങ്കിലും തുടർ നടപടികൾ അനിശ്ചിതമായി വൈകുന്നു. 

ആദ്യമൊക്കെ വ്യാപാരികളിൽ ചിലർ വികസനത്തിന് എതിരു നിന്നെങ്കിലും തുടർച്ചയായ ചർച്ചകളെ തുടർന്ന് റോഡിന്റെ ഇരു ഭാഗത്തു നിന്നും റോഡ് വികസനത്തിനും അഴുക്കു ചാൽ നിർമാണത്തിനും ആവശ്യമായ സ്ഥലം വിട്ടു നൽകാൻ സന്നദ്ധമായി. കെട്ടിട ഉടമകളും വികസനത്തോട് സഹകരിക്കാമെന്നു വ്യക്തമാക്കിയെങ്കിലും പൊതുമരാമത്ത് വകുപ്പിൽ എസ്റ്റിമേറ്റ് അംഗീകരിക്കൽ തുടങ്ങി ടെൻഡർ നടപടികൾ വരെ വൈകുകയാണ്.