ജല ജീവൻ പദ്ധതി കൊടുവള്ളി പഞ്ചായത്തിൽ കീറിയ റോഡുകൾക്ക് എന്ന് ശാപമോക്ഷം

കൊടുവള്ളി∙ ജല ജീവൻ മിഷൻ പദ്ധതിക്കായി കിഴക്കോത്ത് പഞ്ചായത്തിലേക്ക് പ്രധാന പൈപ്പ് സ്ഥാപിക്കുന്നതിന്റെ ഭാഗമായി കീറിയ റോഡുകൾ പൂർവ സ്ഥിതിയിലാക്കാത്തതിനാൽ ദുരിതം. കൊടുവള്ളിക്കടവിൽ ആരംഭിച്ചു കച്ചേരിമുക്ക് വരെ റോഡിന്റെ പല ഭാഗങ്ങളും പൈപ്പ് ഇടാനായി കീറിയെങ്കിലും ഒരു മാസത്തിലേറെയായി പ്രവൃത്തി സ്തംഭിച്ചിരിക്കുകയാണ്. പരാതി ആയതോടെ ക്വാറി അവശിഷ്ടങ്ങൾ കൊണ്ടിട്ടിരുന്നു. എന്നാൽ ഇവയെല്ലാം ഇപ്പോൾ നീങ്ങിപ്പോയ നിലയിലാണ്. ഈസ്‌റ്റ് കിഴക്കോത്ത് ഭാഗത്ത് പ്രധാന പൈപ്പ് പോകുന്ന സ്‌ഥലത്തെ മരം മുറിക്കുന്ന നടപടി നീളുന്നതാണു പ്രവൃത്തി വൈകാൻ കാരണമായി അധികൃതർ പറയുന്നത്. 

മരം മുറിക്കാൻ വനം വകുപ്പിന്റെ അനുമതി കാത്തിരിക്കുകയാണ്. ബാക്കിയുള്ള ഭാഗങ്ങളിലും പൈപ്പ് സ്ഥാപിക്കുന്നതു പൂർത്തിയാക്കിയ ശേഷം കീറിയ റോഡിന്റെ ഭാഗങ്ങളിലെല്ലാം ഒന്നിച്ചു പ്രവൃത്തി നടത്താനാണു തീരുമാനം. സമീപവാസികൾ രൂക്ഷമായ പൊടിശല്യവും നേരിടുന്നുണ്ട്. കീറിയ റോഡുകളിൽ ഇരുചക്ര വാഹനങ്ങൾ അപകടത്തിൽ പെടുന്നതും പതിവാണ്. പലയിടങ്ങളിലും കീറിയ റോഡിന്റെ പകുതിയോളം ഭാഗത്തെ ടാറിങ് നഷ്ടപ്പെട്ട നിലയിലാണ്.