മലപ്പുറം ∙ ലോക്സഭാംഗത്വത്തിൽനിന്ന് അയോഗ്യനാക്കപ്പെട്ട രാഹുൽ ഗാന്ധിക്ക് ഐക്യദാർഢ്യവുമായി മുസ്ലിം ലീഗ് സംസ്ഥാന കമ്മിറ്റിയുടെ സമൂഹമാധ്യമ ക്യാംപെയ്ൻ തുടങ്ങി. രാഹുലിന്റെ ചിത്രത്തോടൊപ്പം ‘വി ആർ വിത്ത് യു’ എന്നെഴുതിയ പോസ്റ്റർ പ്രൊഫൈൽ ചിത്രമാക്കി ലീഗ് സംസ്ഥാന പ്രസിഡന്റ് പാണക്കാട് സാദിഖലി ശിഹാബ് തങ്ങൾ ക്യാംപെയ്ൻ ഉദ്ഘാടനം ചെയ്തു. 10 ലക്ഷം പേർ ഇതിൽ പങ്കാളികളാകുമെന്ന് അദ്ദേഹം പറഞ്ഞു.
‘വി ആർ വിത്ത് യു, രാഹുൽ ഗാന്ധി’ എന്ന ഹാഷ്ടാഗോടെയാണ് പ്രചാരണം. ലീഗ് പ്രവർത്തകർക്കു പുറമേ യുഡിഎഫ് നേതാക്കളും അനുഭാവികളും ഇതു പങ്കുവച്ചു. ക്യാംപെയ്നിന്റെ ഉദ്ഘാടനച്ചടങ്ങിൽ ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി, സംസ്ഥാന ജനറൽ സെക്രട്ടറി പി.എം.എ.സലാം, മലപ്പുറം ജില്ലാ പ്രസിഡന്റ് അബ്ബാസലി ശിഹാബ് തങ്ങൾ, ജില്ലാ ജനറൽ സെക്രട്ടറി പി.അബ്ദുൽ ഹമീദ്, യൂത്ത് ലീഗ് സംസ്ഥാന പ്രസിഡന്റ് മുനവ്വറലി ശിഹാബ് തങ്ങൾ, സയ്യിദ് റഷീദലി ശിഹാബ് തങ്ങൾ, നജീബ് കാന്തപുരം എംഎൽഎ എന്നിവർ പ്രസംഗിച്ചു.
