തെരുവുനായ്ക്കളുടെ ആക്രമണം; മയിലിന് ദാരുണാന്ത്യം

അരക്കുപറമ്പ്∙ തെരുവുനായ്ക്കളുടെ ആക്രമണത്തിൽ പരുക്കേറ്റ മയിലിന് ദാരുണാന്ത്യം. ആട്ടീരിപ്പാറയിലാണ് സംഭവം. നാട്ടുകാർ  നിലമ്പൂർ അമരമ്പലം സൗത്ത് ഫോറസ്റ്റ് ആർആർടി  ഉദ്യോഗസ്ഥരെ വിവരം അറിയിച്ചതിനെ തുടർന്ന് ഫോറസ്റ്റ് ഉദ്യോഗസ്ഥരുടെ നിർദേശപ്രകാരം   സർപ്പ റെസ്ക്യൂവർമാരായ മലപ്പുറം ജില്ലാ ട്രോമാ കെയർ പെരിന്തൽമണ്ണ സ്റ്റേഷൻ യൂണിറ്റ് ഡപ്യൂട്ടി ലീഡർ ജബ്ബാർ ജൂബിലി, ഗിരീഷ് കീഴാറ്റൂർ എന്നിവർ സ്ഥലത്തെത്തി  മയിലിനെ പെരിന്തൽമണ്ണ മൃഗാശുപത്രിയിൽ എത്തിച്ചു. ഡോ. ശിവകുമാർ, ഡോ. മൃദുല എന്നിവരുടെ നേതൃത്വത്തിൽ ചികിത്സ നൽകിയെങ്കിലും ഗുരുതരമായി പരുക്കേറ്റതിനാൽ രക്ഷിക്കാനായില്ല. മയിലിന്റെ ജഡം കരുവാരകുണ്ട് ഫോറസ്റ്റ് ഉദ്യോഗസ്ഥർക്ക് കൈമാറി.