ന്യൂഡൽഹി ∙ സിബിഎസ്ഇ 10–ാം ക്ലാസ് പരീക്ഷയിൽ മലയാളത്തിൽ മുഴുവൻ മാർക്കും നേടിയ വിദ്യാർഥികളെ കേരള ക്ലബിന്റെ നേതൃത്വത്തിൽ അനുമോദിച്ചു. പ്രഫ.ഓംചേരി എൻ.എൻ.പിള്ള ചടങ്ങിൽ മുഖ്യാതിഥിയായിരുന്നു.  മലയാള ഭാഷയുടെ വിജയമാണ് ഈ കുട്ടികൾ തനിക്കു കാണിച്ചുതന്നിരിക്കുന്നതെന്നു പ്രഫ.ഓംചേരി എൻ.എൻ.പിള്ള പറഞ്ഞു. ഉന്നതവിജയം നേടിയവർക്ക് ‘ആകസ്മികം’ എന്ന തന്റെ ആത്മകഥ അദ്ദേഹം ഒപ്പിട്ട് സമ്മാനിച്ചു. 99% മാർക്കു നേടിയ കുട്ടികളെയും ചടങ്ങിൽ അനുമോദിച്ചു. സിപിഎം പൊളിറ്റ് ബ്യൂറോ അംഗം എം.എ.ബേബി, സുധീർ നാഥ്, പിആർഡി ഇൻഫർമേഷൻ ഓഫിസർ സിനി തോമസ്, കേരള ക്ലബ് വൈസ് ചെയർമാൻ എ.ജെ.ഫിലിപ്പ്, ട്രഷറർ യു.രാധാകൃഷ്ണൻ, ഉമ രാജേഷ് എന്നിവർ പ്രസംഗിച്ചു.