ചകിരി ഫാക്ടറിയിൽ തീപിടിത്തം
Mail This Article
മുതലമട ∙ ഗോവിന്ദാപുരത്തെ ചകിരി ഫാക്ടറിയിൽ തീ പടർന്നു. ഇന്നലെ ഉച്ചയ്ക്കു 2 മണിയോടെയാണു സംഭവം. തീ അണയ്ക്കാൻ അഗ്നി സുരക്ഷാ സേനയുടെ 3 യൂണിറ്റ് മണിക്കൂറുകൾ നീണ്ട പ്രയത്നം രാത്രി വൈകിയും തുടരുകയാണ്. കയർ നിർമാണത്തിനായി തേങ്ങ തൊണ്ടിൽ വേർതിരിച്ച ചകിരിയുടെ 30 കിലോഗ്രാം വരുന്ന എണ്ണായിരത്തോളം കെട്ടുകളാണ് ഇവിടെ കൂട്ടിയിട്ടിരിക്കുന്നതെന്നും ലക്ഷങ്ങളുടെ വേർതിരിച്ച ചകിരിയാണു നശിച്ചതെന്നും നീളിപ്പാറയിലെ ചകിരി കമ്പനിയുടെ ഉടമ എസ്.ബിന്ദു പറഞ്ഞു.
തീ അണയ്ക്കുന്നതിനായി തമിഴ്നാട്ടിൽ നിന്നും ടാങ്കർ ലോറിയിൽ വെള്ളം എത്തിച്ചും മണ്ണുമാന്തി യന്ത്രം ഉപയോഗിച്ചു ചികിരി കൂമ്പാരത്തെ വേർതിരിച്ചുമാണു തീ അണയ്ക്കാനുള്ള ശ്രമങ്ങൾ നടത്തുന്നത്. ചകിരിക്കു തീ പടർന്നതോടെ പ്രദേശത്തു വലിയ പുകപടലങ്ങൾ രൂപപ്പെട്ടതും അണയ്ക്കാനുള്ള ശ്രമങ്ങൾക്ക് ആദ്യ ഘട്ടത്തിൽ തിരിച്ചടിയായി.