വൈദ്യുതി ഉപയോഗത്തിൽ ക്രമക്കേട്; 14.6 ലക്ഷം പിഴ
Mail This Article
അഗളി∙ അട്ടപ്പാടിയിൽ വൈദ്യുതി ഉപഭോഗത്തിൽ വ്യാപക ക്രമക്കേടുകൾ കണ്ടെത്തി. 14.6 ലക്ഷം രൂപയുടെ പിഴ ചുമത്തി. അഗളി ഇലക്ട്രിക്കൽ സബ് ഡിവിഷൻ പരിധിയിൽ വിവിധ സ്ഥലങ്ങളിൽ വൈദ്യുത ബോർഡ് വിജിലൻസ് വിഭാഗം നടത്തിയ പരിശോധനകളിലാണ് ക്രമക്കേടുകൾ കണ്ടെത്തിയത്.
അനുവദനീയമായതിൽ കൂടുതൽ കണക്ടഡ് ലോഡ്, കുറഞ്ഞ നിരക്കിലെ വൈദ്യുതി ദുരുപയോഗം തുടങ്ങിയ ക്രമക്കേടുകളാണ് മിക്കയിടത്തും കണ്ടെത്തിയത്. റിസോർട്ടുകളിലും മത സ്ഥാപനത്തിലും ക്രമക്കേട് കണ്ടെത്തി നോട്ടിസ് നൽകി. ആന്റി പവർ തെഫ്റ്റ് സ്ക്വാഡ് അസി.എക്സിക്യൂട്ടീവ് എൻജിനീയർ ബി.ഹരികുമാർ,അസി.എൻജീനിയർ വി.വി.ശശീന്ദ്രൻ എന്നിവരുടെ നേതൃത്വത്തിലായിരുന്നു പരിശോധന. ഏതെങ്കിലും തരത്തിലുള്ള വൈദ്യുതി മോഷണം ശ്രദ്ധയിൽ പെട്ടാൽ താഴെ കൊടുത്ത ഫോൺ നമ്പറിൽ വിവരം നൽകണമെന്ന് വിജിലൻസ് വിഭാഗം അറിയിച്ചു. 9446008162, 9446008163.