വെണ്ണിക്കുളത്ത് വ്യാപാരികൾ തമ്മിൽ തർക്കം; അച്ഛനും മകനും വെട്ടേറ്റു

വെണ്ണിക്കുളം ∙ വ്യാപാരികൾ തമ്മിലുള്ള തർക്കത്തിനിടെ അച്ഛനും മകനും വെട്ടേറ്റു. സ്കൂൾ കവലയിൽ ബേക്കറി നടത്തുന്ന കലൈസെൽവൻ (60), മകൻ ജാക്സൻ (29) എന്നിവർക്കാണ് വെട്ടേറ്റത്. ഇന്നലെ വൈകിട്ട് ആറിനായിരുന്നു സംഭവം.

വലത് കൈയ്ക്ക് സാരമായി പരുക്കേറ്റ കലൈസെൽവനെയും വലത് കണ്ണിനോടു ചേർന്ന് മുറിവേറ്റ ജാക്സനെയും തിരുവല്ലയിലെ സ്വകാര്യ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. കോയിപ്രം പൊലീസെത്തി പ്രാഥമിക അന്വേഷണം നടത്തി. ഇവരെ വെട്ടിയതിന് തൊട്ടടുത്ത് സ്റ്റേഷനറിക്കട നടത്തുന്ന ഷാജി എന്നയാൾക്കെതിരെ പൊലീസ് കേസെടുത്തു. ഷാജിയുടെ കടയുടെ വരാന്തയിലൂടെ കലൈസെൽവൻ നടന്നുപോയി എന്നാരോപിച്ചാണ് തർക്കമുണ്ടായത്.